Gizartea -
Forondako Aireportua
Gizon bat identifikatu dute Forondara zihoazen hegazkinak laser batekin itsutzeagatik
Pilotuek kontrol-dorreari jakinarazi ostean Forondako pistan lurreratzen ari zirela inguru beretik itsutu dituztela, hainbat aldiz jarri dute martxan segurtasun protokoloa.
AGENTZIAK | ERREDAKZIOA
Espainiako Poliziak gizon bat identifikatu du Forondako aireportura hurbiltzeko maniobrak egiten ari ziren hegazkinak laser batekin itsutzeagatik.
Poliziak azaldu duenez, Forondan lur hartu baino lehen laser batekin itsuarazi egin zietela ohartarazi zuten hainbat pilotuk eta, ondorioz, kontrol-dorreak segurtasun protokoloa sarritan jarri behar izan du martxan. Gizona Miranda Ebro ingurutik aritzen zela erantsi dute.
Tripulazioren segurtasuna eta segurtasun aeronautikoa arrisku larrian jarri dituela azpimarratu du Poliziak. "Aireportura hurbiltzeko maniobrak egiteak kontzentrazio handia eskatzen du, eta horrelako gertakari batek istripu bat eragin dezake", gehitu du.
Gizonak erabilitako laserren jabetza mugatua dago eta baimen bereziak behar dira. Mota horretako gailuen erabileraren arriskua nabarmendu dute: kirol eta musika ikuskizunetan zuzenean apuntatzea, esaterako.
Praktika honek Herritarren Segurtasunaren Babesari buruzko 4/2015 Legearen 35.4 artikuluan ezarritakoa urratzen du. Horren arabera, arau-hauste oso larria da pilotu edo garraiobideen gidariei itsutzea edota arreta galaraztea eragin diezaiekeen argiren bat zuzentzea, edozein gailu erabilita ere. Araua urratzen duenak 30.001 eta 600.000 euro arteko isuna jaso dezake.