Bilbon etxe eta ibilgailu baten aurka tiro egiteagatik atxilotutako gizona, aske

Ostiralean gizon bat atxilotu zuten Bilbon, hilketa saiakera egotzita, etxe baten fatxadaren eta ibilgailu baten aurka egindako tiroekin zerikusia zuelakoan. Epaileak atxilotua aske utzi du larunbat honetan.

Hala ere, 30 urteko susmagarria laster epailearen aurrean agertu beharko da deitzen dutenean, Segurtasun Saileko iturriek jakitera eman dutenez.

Gertakariekin ustez zerikusia duen bigarren gizon bat aurkitzeko ikerketa zabalik du Ertzaintzak. Tiroketa 00:30 aldera gertatu zen ostiralean.

Ordu horretan, patruila batek abisua jaso zuen, Bilboko kale batean tiro egin zutelako.

Gizon batekin harremanetan jarri ondoren, ezagun batek hiltzeko mehatxua egin ziola jakin zuten ertzainek. Gainera, haren etxeko fatxadari eta autoari tiro egin zion, ibilgailua gertu aparkaturik zegoelako. Tiroen egileak auto batean ihes egin zuen, beste gizon batekin batera.

Aurreneko miaketa batean, ertzainek bala zuloak ikusi zituzten ibilgailuan zein eraikinean, eta furgonetatik gertu jaurtigai eta kartutxo detonagailu bat topatu zituzten.

Ondoren, ustezko egileak ihes egiteko erabilitako ibilgailua aurkitu zuten handik hurbil. Ertzainek gidaria identifikatu, ustezko erasotzailearen senide bat, eta atxilotu zuten hilketa saiakera leporatuta.

Atxilotua ertzain-etxean egon da, larunbat goizean epailearen esku jarri duten arte. Epaileak aske uztea erabaki du, hori bai, deitzen diotenean agerraldia egin beharko du.