Nafarroak landa ingurua despopulatzeko arriskua onartu du eta neurriak hartuko ditu

Nafarroan datu kezkagarriak izatetik "urrun" dauden arren, "landa ingurua despopulatzeko arriskua" onartu du astelehen honetan Foru Gobernuak, eta, horren aurrean, Jurramendin, Zangozan, Erdialdean, Nafarroako Pirinioetan eta Pirinioaurrean, besteak beste, neurri zehatzak hartuko dituela iragarri du.

Hala aurreratu dute astelehen honetan Bernardo Ciriza Lurralde Kohesiorako kontseilariak, Jesus Mari Rodriguez Tokiko Administrazio eta Despopulazio zuzendari nagusiak eta Luis Campos Errealitate Sozialaren Behatokiaren eta Gizarte Politiken Plangintzaren eta Ebaluazioaren zuzendari nagusiak. Halaber, "Nafarroako eremu desberdintasunen diagnostikoa: erronkak eta proposamenak" txostena aurkeztu dute kazetarien aurrean egindako agerraldian.

Cirizaren arabera, oro har, "Nafarroan biztanle kopuruak gora egin badu ere, eta despopulazio arazo larri bati buruz hitz egiterik ez dugun arren, badaude eremu batzuk non dagoeneko populazioaren atzerakada eman den".

Pirinioak eta Ameskoak izango lirateke udalerri horiek, Zangoza eta Jurramendirekin batera, biztanleriaren zahartze maila handiagoa eta dentsitate txikiagoa erakusten baitute.

Hala, arazoari irtenbidea emateko asmoz, Gobernua dagoeneko lanean ari da, despopulazioari aurre egiteko neurri zehatzak zehaztuko dituen estrategia bat prestatzen.