Gizartea -
Saudi Arabiako zamaontzia
Saudi Arabiako arma-zamaontzia Bilbon porturatzearen aurka protesta egin dute
Amnistia Internazionalak, Greenpeacek, Oxfam Intermonek, Kem-Mocek eta Ongi Etorri Errefuxiatuakek elkarretaratzea egin dute Bilboko Arriaga plazan.
Agentzia | Erredakzioa
Bahri Yambu ontzia datozen orduetan Bilboko Portura helduko dela salatu du 'Gerra hemen hasten da' plataformak. Saudi Arabiako bandera duen zamaontziak armak kargatzeko asmoa du, "Portuaren eta erakundeen adostasunarekin", kritikatu dutenez.
Amnistia Internazionalak, Greenpeacek, Oxfam Intermonek, Kem-Mocek eta Ongi Etorri Errefuxiatuakek elkarretaratzea egin dute Bilboko Arriaga plazan. Armen kargarekin "Giza Eskubideak urratu eta ausiabartza eragingo dute", salatu dutenez.
Alberto Estefania 'Gerra hemen hasten da' plataformako kideak gogorarazi duenez, duela bi urte, "kolektibo ezberdinen presioari esker", Bahri Yambu-k Bilboko Portuan armak kargatzeari uztea lortu zuten.
Hala ere, ontzia Bilboko Portuaren sarreran dago igande honetan, eta urteak eman ditu armak Saudi Arabiara eta Arabiar Emirerri Batuetara eramaten, gaineratu duenez. Estefaniaren ahotan, armak "Yemengo gerran" erabili dituzte, "200.000 pertsona baino gehiago hil dituzte bertan".
"Datozen orduetan armak kargatuko dituztela salatu nahi dugu; portua bera, erakundeak eta ontzia ados jarri dira, eta Giza Eskubideen urraketari ekin diote", azpimarratu du.
