Haize-boladek 145 km/h-ko abiadura gainditu dute Matxitxakon eta 137 km/h-koa Urduñan

Eusko Jaurlaritzako Segurtasun Sailak abisu horia ezarri du gaur, astelehena, haizeguneetan 100 km/h-ko abiadura gainditu dezaketen haize-ufadak direla eta, batez ere itsasertzean. Horrez gain, 80 km/h-ko haize-ufadak espero dira kostaldetik gertu dauden inguruetan.

Goizaldean, 145,4 km/h-ko haize-ufadak izan dira Matxitxakon, 137,6 km/h-koak Urduñan eta 122,8 km/h-koak Zaldiaranen. Beluntzan eta Galea lurmuturrean ere, 100 km/h-ko abiadura gainditu dute.

Euskalmet Euskal Meteorologia Agentziak iragarri duenez, hainbat fronte iritsiko dira gaur. Ondorioz, ipar-mendebaldeko haize zakarra nagusituko da eta prezipitazio ugari izango dira. Horrenbestez, giro euritsua izango da egun osoan, eta zerua oso hodeitsu egongo da.

Euskalmetek jakinarazi duenez, egunean zehar zaparrada handiak izango dira, eta baliteke ekaitzak jotzea, batez ere kostaldean. Elur-kota pixkanaka jaisten joango da, eta 1.000 metro inguruan kokatuko da eguerdian, eta 800-900 metro inguruan, gauerako.

Halaber, itsasaldeko arriskuagatik abisu horia ezarri dute. Nabigaziorako lehen bi itsas milietan ezarritako abisua egun osoan egongo da indarrean, izan ere, 4,5 metrorainoko olatuak espero dira arratsaldean. Egunak aurrera egin ahala, olatuen altuera jaisten joango da, eta 3-3,5 metrokoak izango dira gauean.

Bihar, asteartea, ez da aldaketa handirik espero, baina prezipitazioak arratsaldean ugarituko dira. Hala, goizean, bereziki goizaldean eta eguneko lehen orduetan, euri-jasak ez dira hain orokorrak izango.

Elur-maila 800-900 metro inguruan kokatuko da goizaldean, eta 1.500 metro ingurura igoko da gauean. Haizeak mendebaldetik joko du, eta ipar-mendebaldekoa nagusituko da egunaren bigarren partean, bolada gogorrekin haizeguneetan. Tenperaturak ez du aldaketa handirik izango.