Itxi

Gizartea

KORONABIRUSA

SARS-CoV-2a hiru egunez egon daiteke azaleretan

AGENTZIAK | ERREDAKZIOA

Emaitzek pertsonak airearen bidez eta kutsatutako objektuak ukitu ondoren kutsatu daitezkeela iradokitzen dute.

  • Jendea Gasteizko kaleetan

    Jendea Gasteizko kaleetan. Irudia: EFE

Koronabirus gaitza eragiten duen birusak hainbat orduz edo egunez iraun dezake aerosoletan eta gainazaletan, AEBetako Osasun Institutu Nazionaletako eta Gaixotasunak Kontrolatzeko eta Aurreikusteko Zentroetako zientzialariek, Los Angelesko Kaliforniako Unibertsitateak (UCLA) eta Princetongo Unibertsitateak egindako ikerketa baten arabera.

Hain zuzen ere, zientzialariek SARS-CoV-2 koronabirusa hiru orduz aurkitu daitekeela aerosoletan jakin dute, lau orduz kobrean, 24 orduz kartoian eta bizpahiru egunez plastikoan eta altzairu herdoilgaitzean.

Emaitza horiek koronabirusaren egonkortasunari buruzko funtsezko informazioa ematen dute, eta pertsonak airearen bidez eta kutsatutako objektuak ukitu ondoren kutsatu daitezkeela iradokitzen dute.

Rocky Mountain Laborategietako Alergia eta Gaixotasun Infekziosoen Institutu Nazionaleko Montanako instalazioko zientzialariek, inguruneak SARS-CoV-2ari eta SARS-CoV-1ari nola eragiten dien alderatu zuten. Azken horrek arnas sindrome akutu larria eragiten du.

SARS-CoV-1a Txinan sortu zen eta 2002an eta 2003an 8.000 pertsona baino gehiago kutsatu zituen. Kontaktuen miaketa intentsiboak eta kasuak isolatzeko neurriek desagerrarazi zuten, eta 2004tik ez da kasurik antzeman. SARS-CoV-2arekin lotura handiena duen giza koronabirusa da. Egonkortasun azterketan, bi birusek antzera jokatu zuten, baina horrek ez du azaltzen Covid-19a agerraldi askoz handiago bihurtu izanaren arrazoia.

Sortzen ari den ebidentziak SARS-CoV-2 birusarekin kutsatutako pertsonak birusa zabaltzen aritu daitezkeela iradokitzen du, sintomak ezagutu gabe edo ezagutu aurretik. Ondorioz, SARS-CoV-1aren aurka eraginkorrak diren neurriak ez lirateke hain eraginkorrak izango haren ondorengoaren aurka.

SARS-CoV-1a ez bezala, badirudi SARS-CoV-2 birusaren transmisioaren bigarren mailako kasu gehienak ingurune komunitarioetan gertatzen ari direla, osasun-inguruneetan gertatu beharrean. Hala ere, osasun-inguruneak ahulak dira SARS-CoV-2 agerraldien eta hedapenaren aurrean, baita aerosoletan eta gainazaletan duen egonkortasunaren aurrean ere. Horrek, ziurrenik, birusa osasun-inguruneetan transmititzen laguntzen du.

Kontuan izan osasun agintariek koronabirusaren aurrean eman dituzten aholkuak. Albiste faltsuak zabaldu arren, agintariek emandakoei bakarrik egin kasu. Zalantzarik baduzu edo gaitza hedatu den gune batera bidaian joan ostean sintomarik baduzu, Osasun Kontseiluaren telefonora dei dezakezu: 900 20 30 50 (EAE) eta 948 290 290 (Nafarroa). Gogoratu COVID-19 gaitza ez hedatzeko modurik eraginkorrena eskuak sarri garbitzea dela; ahoa estaltzeko maskarak bakarrik dira gomendagarriak sintomak badituzu edo adineko pertsonekin edo immunodeprimituekin harremanetan bazaude.
  • Bisitatuena

      Kargatzen ikusiena
      Kargatzen ikusiena