Gizartea -
Koronabirusa
LABek anbulantziak geldirik daudela salatu du Araban, plantillan bajak daudelako
Sindikatuak adierazi du profesional horietako batzuk lanerako ezintasun egoeran daudela, babes ekipamendurik ez dutelako.
Agentziak | Erredakzioa
LABek salatu du "egunero" Arabako "hainbat anbulantzia" garajean geratzen direla, eta larrialdietarako garraio sanitarioko bi anbulantzia "egunero 12 orduz geldirik" daudela azpimarratu du, langileetako batzuk bajan daudelako eta ez dituztelako haien lekuak betetzen.
Sindikatuak ohar baten bidez jakinarazi duenez, profesional horietako batzuk aldi baterako ezintasun-egoeran daude "babes ekipamendurik ez dutelako", eta anbulantzia guztiak egunean 24 orduz zerbitzua emateko eta babes-ekipoak izateko eskatu du, bajak "ahalik eta lasterren" ordezkatu ahal izateko.
LABek kritikatu egin du "Osakidetzak zenbait enpresarekin, Taxiak edota Mercedes kasu, adostu duela covid-19arekin harremana izan duten gaixoak garraiatzea". "Langile boluntario horien osasuna arriskuan jartzen ari dira", salatu du. Sindikatuaren arabera, "aipatutako enpresetakoek ez daukate lan hori egin ahal izateko eskatzen den titulazioa (OGT eta OLT), ezta osasun garraioari buruzko Errege Dekretuan islatzen den esperientzia ere".