Toledoko istripuak ezbaian jarri du atrakzioen segurtasuna

Atzo Villacañasen (Toledo) izan zen istripua (hiru gazte hil ziren, barraketako atrakzio bat askatu eta airean irten ondoren) Euskadin gertatzea ezinezkoa litzateke, Alberto Dominguez Euskadiko ferietako erosle elkartearen idazkari nagusiaren arabera.

Dominguezek adierazi duenez, atrakzio hori (beso mekaniko bat eta lau eserleku ditu aurrez aurre, eta Extreme du izena), Euskadiko ferietan erabiltzeari utzi zioten, zaharra geratu zela eta. "Polonian egindako aspaldiko atrakzio batez ari gara; ezinezkoa da hori Euskadin ikustea", azaldu du.

Tamalez, Villacañasen ezin izan zuten istripua saihestu. Egunotan herriko jaiak ospatzen ari dira eta atzo, 04:00etan, 20 eta 31 urte arteko hiru gazte hil egin ziren eta 16 urteko nerabe bat larri zauritu zen atrakzioko beso bat bitan apurtu zenean.

Oraingoz ez dira ezagutzen ezbeharraren arrazoiak, baina barrakaren arduradunek eta Villacañasko Udalak (PSOE) udal baimen guztiak behar bezala zeudela nabarmendu zuten.

400 atrakzioDominguezek jakitera eman duenez, Euskadin 400 atrakzio daude, eta urtean 20 feriatara joaten dira, batez beste; beraz, bakoitzak, gutxienez, 20 kontroletatik pasatzen ditu.

"Hori gutxi balitz, atrakzio batek urteroko ziurtagiri berrikuspena pasatu behar du, ibilgailuetan IAT (ibilgailuen azterketa teknikoa) pasatzen den bezala; antzinatasunaren arabera, sei hilabetean edo urtean behin egingo dute. Gainera, feria guztietan ezin ditugu tresnak martxan jarri ingeniari batek ondo dabilela egiaztatu arte. Hark ontzat eman gabe, ezin da barraka hori ireki" nabarmendu du Dominguezek.