Gizartea -
Koronabirusa
Bi gazte atxilotu dituzte Gasteizen, konfinamendua 8 eta 5 aldiz urratzeagatik
Atxilotuetako bat bere etxebizitzakoa ez zen atari batean harrapatu dute, eta bestea bizikletan zihoala, horretarako justifikaziorik gabe.
Agentziak | Erredakzioa
19 eta 18 urteko bi gizonezko atxilotu dituzte Gasteizen desobedientzia larria leporatuta, konfinamendua 8 eta 5 aldiz urratu ostean.
Gasteizko Udalak jakitera eman duenez, Udaltzaingoak asteazkenean, 17:30ean, dei bat jaso zuen Norteko Trenbidearen kaleko atari batean eztabaida bat zegoela esateko.
Bertaratu ziren agenteek mutil bat ikusi zuten atari horretatik ateratzen eta inguruko beste batean sartzen, ezkutatzeko asmoz, antza.
Harrapatu eta konfinamendua arrazoirik gabe urratzen zuen zortzigarren aldia zela baieztatu eta gero, atxilotu eta polizia-etxera eraman zuten. 19 urteko mutila datozen orduotan eramango dute epailearen aurrera.
Bizikletan
Beste atxiloketa 09:20an egin zuten, Heraclio Fournier kalean, patruila batek gazte bat justifikaziorik gabe bizikletan zebilela ikusi ondoren.
Horrekin, 18 urteko mutilak konfinamendua bosgarren aldiz urratu duela jakin zutenean, atxilotu egin zuten, epailearen esku uzteko.
