Hego Euskal Herritik Iparraldera doazenek berrogeialdia egin beharko dute

Espainiatik heldutako bidaiariek koarentea egin behar izatea erabaki duFrantziako Gobernuak.

Charles de Gaulleko 2. terminalean dagoen Air Franceko fakturazio-mahaiaren garbiketa — 14 egunez egongo dira koarentenan. Argazkia: EFE

AGENTZIAK | ERREDAKZIOA

publikatuta: 2020/05/14 18:32 (UTC+2)

azken eguneratzea: 2020/05/14 19:29 (UTC+2)

Frantziako Gobernuak 14 egunez koarentenan jarriko ditu Espainiatik heldutako bidaiariak, Espainiako Gobernuak atzerritik datozen bidaiari guztiekin hartutako neurriagatik, Eliseo Jauregiko iturriek jakitera eman dutenez. Horrenbestez, Euskaditik eta Nafarroatik Zuberoara, Lapurdira edota Nafarroa Behereara joaten direnek berrogeialdia egin beharko dute.

Iturriek azpimarratu dutenez, koarentenatik salbuetsita dauden kasuetan izan ezik, hala nola mugaz gaindiko langileak, xedapen hau Espainian indarrean dagoen denbora berean aplikatuko du Frantziak, hasiera batean bihartik maiatzaren 15era arte, hau da, alarma-egoera amaitu arte, maiatzaren 24ra arte, eta balizko luzapenetan.

Frantziako Presidentetzaren arabera, erabakia "arrazoi politikoengatik eta eraginkortasunagatik" hartu dute: "Ezin dugu imajinatu herrialde batetik bestera pasatzea alderantziz baino errazagoa denik", adierazi dute iturriek.

Kontuan izan osasun agintariek koronabirusaren aurrean eman dituzten aholkuak. Albiste faltsuak zabaldu dira, agintariek emandakoei bakarrik egin kasu. Gaitzaren sintomarik baduzu, EAEn bizi bazara, osasun-zentrora deitu, eta zalantzarik izatekotan, Osasun Batzordearen telefonoa duzu eskuragarri: 900 20 30 50. Nafarroan bizi bazara, Osasun Batzordearen telefonora dei dezakezu: 948 290 290. Gogoratu, COVID-19a ez hedatzeko modurik eraginkorrena eskuak sarri garbitzea dela; ahoa estaltzeko maskarak gomendagarriak dira sintomak badituzu edo adineko pertsonekin edo immunodeprimituekin harremanetan bazaude, eta derrigorrezkoak garraio publikoa erabiltzen baduzu.

Hau zure interesekoa bada, baliteke beste gai hauek ere izatea

Espainiako Gobernua Frantzia Gaixotasunak Gizartea Eguneko albisteak Albisteak Erizaintza Koronabirusa

Hego Euskal Herritik Iparraldera doazenek berrogeialdia egin beharko dute

Esteka kopiatuta