Gizartea -
Koronabirusa
Eudelek gehienez 250 laguneko edukiera ezarri du udako ekitaldietarako
Zabaldutako adierazpenak zehaztu duenez, halaber, pertsona bakoitzeko 4 metro koadroko espazioa izan beharko da aire zabalean zein toki itxietan antolatuko diren ekitaldietan.
Agentziak | Erredakzioa
Euskadiko Udalen Elkarteak, Eudelek, uda honetan antolatzen diren era guztietako udal ekitaldiak eta jarduerak baimentzeko, bai aire zabalean, bai esparru itxietan, gehienez 250 laguneko (eserita) edukiera onartu du, eta pertsonen artean bi metro linealeko segurtasun-tartea gorde beharko da.
Eudeleko Batzorde Exekutiboak atzo adostutako akordioan bildutako irizpideetako bat da hori. Udan eta irailaren 15era arte antolatzen diren ekitaldiak eta jarduerak aurrera eramateko jarraitu behar diren gomendioak biltzen ditu. Erabakia igorri zaie jada euskal udalerrietako alkateei.
Udako udal jarduerak baimendu edo antolatzeko Eudelen gomendioak jarraitu beharko dira, "betiere unean uneko osasun xedapenak betez, beste irizpide batzuk justifikatzen diren kasu zehatzetan izan ezik".
Ostiral honetan zabaldutako zirkularrak zehaztu duenez, horrelako ekitaldiak edo jarduerak antolatzen diren guneetan, aire zabalean zein toki itxietan, pertsona bakoitzak 4 metro koadroko espazioa izan beharko du.
Gainera, horientzat egokitutako espazio publikoaren gehienezko okupazioa 1.000 metro koadrotik gorakoa ez izatea gomendatzen da.
Era berean, jakinarazi da udako eta eguneko udalekuetako jarduerak bertan behera geratu direla, eta barruko udal-instalazioak itxita egongo direla, ekitaldi zehatz bat izan ezean.
Elkarte horretako Batzorde Eragileak, azkenik, igerilekuen eta hondartzen kudeaketari helduko dion lantalde bat eratzea adostu du, horren inguruko irizpidea eman dezan.
