COVID-19ak eragindako Bizkaiko egoitzetako erabiltzaileak 33ra jaitsi dira

COVID-19ak eragindako Bizkaiko adinekoen egoitzetako erabiltzaileen kopurua 33ra jaitsi da, eta horietatik bederatzi ospitaleratuta daude. Kutsatuen kopuru osoa duela 48 ordu emandako azken balantzean baino 16 gutxiago da. Era berean, 1.579 egoiliarrek gaixotasuna gainditu dute, eta negatibo eman dute egindako probetan.

Bizkaiko Foru Aldundiko Gizarte Ekintza Saileko Ikuskaritza eta Kontrol Zerbitzura helarazitako datuen arabera, joan den ostegunean (ekainaren 4an) lanaldia ixtean, lurraldeko adinekoentzako 155 egoitzetatik 13k zuten koronabirusa egiaztatuta zuen erabiltzaileren bat.

Bizkaiko egoitza-sareak, 10.748 plaza dituenak, koronabirusaz kutsatutako 33 egoiliar ditu, 48 ordu lehenago egindako zenbaketan baino 16 gutxiago. Horietatik 9 erietxeetan daude, duela bi egun baino bi gutxiago.

Gainera, Birjinetxeko unitate soziosanitario espezializatuak 21 adineko hartzen ditu, koronabirus bidezko infekzio-kasuak artatzeko.

Bestalde, 39 langilek positibo eman dute Bizkaiko egoitzetan, aurreko zenbaketan baino zortzi gutxiagok. Beste 83 langile isolamenduan daude, baina ez dute COVID-19aren baieztapenik.

Bizkaiko Foru Aldundiak jakitera eman duenez, maiatzean 38 erabiltzaile hil dira COVID-19aren frogetan positibo emanda, eta beste bi pertsona hil dira gaixotasun horrekin bateragarriak diren susmoekin edo sintomekin.

Maiatzeko datuak batuta, Bizkaiko egoitza-sareak 285 hildako izan ditu koronabirusaren pandemia hasi zenetik, eta 32 egoiliar birusak jota egon zitezkeelakoan.