Gizartea -
Koronabirusa
Guillermo Quindos: "Logikoa da foku txikiak egotea, noizean behin gerta daiteke"
Mikrobiologoak Radio Euskadin azaldu duenez, ez dago jakiterik zein den Basurtuko eta Txagorritxuko ospitaleetan atzeman dituzten koronabirusaren agerraldi berrien jatorria.
Radio Euskadi | Erredakzioa
Deseskalatze prozesuaren 3 fasean gaude jada, baina Basurtuko eta Txagorritxuko ospitaleetan atzeman dituzten koronabirusaren agerraldi berriekin erne daude osasun arloko agintariak. Dena dela, Guillermo Quindos mikrobiologoak Radio Euskadiko Boulevard albistegian adierazi duenez, "logikoa da foku txikiak egotea"; izan ere, "Estatuko beste leku batzuetan ere ikusi izan dira". Hala, "noizean behin" hori gerta daitekeela gaineratu du.
Ez dago jakiterik zein den agerraldi berrien jatorria; izan ere, "hasieran positibo eman zuten pertsonek proba eginda zuten, oraingoan negatibo emanez", eta horrek nolabaiteko ezinegona sortzen du, baina probek atalase bat behar dute positibo emateko. "Errazagoa da negatibo ematea birusa inkubatzen ari direnean. Kontuan izan behar da 14 egunera irits daitekeela, eta epe horretan birusa ez dela probetan atzematen".
Nolanahi ere, dagoeneko koronabirusari buruzko gauza asko dakizkigula esan du Guillermo Quindosek, hala nola "pertsona gutxik zabaltzen dutela infekzioa, nahiz eta kutsatuta egon, eta kutsatze gehienak leku itxietan gertatzen direla".
Jatorrizko informazioa Radio Euskadik landu eta eitb.eus-ek itzuli du:
7:05
