Gizartea -
Koronabirusa
Mugikortasun librea egongo da Euskal Herri osoan igandetik aurrera
Muga irekitzea adostu dute Espainiako eta Frantziako agintariek, eta alarma egoera amaituta egongo denez, posible izango dira EAE eta Nafarroa arteko joan-etorriak.
eitb.eus
Igandetik aurrera Euskal Herri osoko mugikortasuna egongo da bermatuta, izan ere, Espainiako eta Frantziako gobernuek mugaren irekiera egun bat aurreratzea adostu dute, EiTBk jakin ahal izan duenez.
Frantziako jendarmeek eta Espainiako Poliziak ez dute paper berezirik eskatuko igandetik aurrera muga igarotzeko. Izan ere, Espainiako eta Frantziako gobernuak adostasun batera iritsi dira, eta Pirinio Atlantikoetako Prefeturak indarrean zegoen oharra aldatu eta egun bat aurreratu du mugaren irekiera.
Gainera, Espainiako Estatuan alarma egoera amaituta egongo denez, zirkulazio librea egongo da.
Gaur, Iñigo Urkullu lehendakariak eta Miguel Angel Revilla Kantabriako presidenteak alarma egoerari amaiera eman dion ekitaldian parte hartu dute. Bizkaiko eta Kantabriako kostaldea lotzen dituen oinezkoentzako bide batean elkartu dira bi agintariak.
