Bisitak debekatu dituzte Bidarteko Ramuntxo egoitzan, bi positibo atzeman ostean

Emmanuel Alzuri Bidarteko auzapezak Sud-Ouest egunkariari jakitera eman dionez, Ramuntxo udal adinekoen egoitzako bi egoiliar Baionako ospitalera eraman behar izan dituzte koronabirus sintomekin hasi eta PCR testean positibo eman ondoren.

Protokoloa jarraituz, pertsona horiekin harremana izan duten bi erizain eta zaintzaile bati PCR proba egin diete eta gainontzeko egoiliar eta langile guztiei ere PCR probak egingo dizkiete datorren astetik aurrera, eta bisitak debekatu egin dituzte egun batzuetarako.

Gainontzeko egoiliarrak euren geletan dira, isolamenduan, eta jangela itxi dute, bertan elkar ez daitezen.

Koronabirus kasu kopurua seikoiztu egin da azken hiru asteetan Akitania Berrian, Ipar Euskal Herria barne hartzen duen eskualdean eta Pirinio Atlantikoetako departamendua "arrisku ertaineko gune" gisa agertzen da jada Frantziako osasun agintariek izendatzen duten mapan.