Lekeitio itxiko dute bertan behera utzitako San Antolin jaietan eta Antzar Egunean

COVID-19aren pandemiagatik San Antolin jaiak bertan behera utzi ditu Lekeitioko Udalak, eta udalerriaren irteerak eta sarrerak itxiko ditu Antzar Egunaren bezperan eta egun berean, irailak 5ean, jende-pilaketak saihesteko, Lekeitioko Udalak ohar baten bidez jakinarazi duenez. Hortaz, Lekeitiora sartu ahalko dira bakarrik han bizi, lan egin edota hotel-erreserba dutenak, eta ez da garraio publikorik egongo.

"Aurten ez da aurreko urteetan bezala, eta ezingo dugu jaiak ospatu COVID-19ak eragindako egoeragatik, jaien gainetik, guztion osasuna dagoelako, eta arduraz jokatu behar dugulako", azpimarratu du Udalak.

Gauzak horrela, auzokideei eskatu die jairik ez egiteko edota festa egitera gonbidatu dezakeen jokabiderik ez izateko, "bereziki jende-pilaketak izan daitezkeen egunetan, hau da, irailaren 1ean, Koadrilen Desfilean, eta Antzar Egunean, irailaren 5ean". 

Gainera, bisitariei eskatu diete Lekeitiora ez etortzeko, eta bertakoei "zentzuz aritzeko, orain arte bezala". "Konponbidearen parte izan gaitezen, ez arazoaren parte. Ez utz dezagun kontrolatu ezin daitekeen birusa hedatzea. Gure ekintzek ondorio larriak izan ditzakete gugan eta gure senideengan. Izan gaitezen arduratsu", eskatu du Udalak.

Koldo Goitia Lekeitioko alkateak argitu duenez, neurri hori hartu dute "Gernikan jazotako bera" saihesteko. Gernikako "ez-jaietan" koronabirus agerraldi bat izan zen, eta 100 lagun baino gehiago kutsatu ziren tabernetan solasean ibili ostean.

Bideoa: ''Arduraz'' jokatzeko eta Antzar Eguna ez ospatzeko deia egin du Lekeitioko alkateak:

1:19