Galiziak zazpi hiri eta zenbait udalerri mugakide itxi ditu

Galiziako Xuntak iragarri duenez, zazpi hiri eta mugakide dituzten udalerrietako batzuk itxiko ditu ostiral arratsaldetik aurrera. Gainera, gune horietako batzuetan pertsonen arteko bilerak are eta gehiago mugatuko ditu eta bizikide diren pertsonak soilik elkartu ahal izango dira. Guztira, asko jota bost pertsona batu ahalko dira.

Batzorde klinikoaren bileraren ostean, Julio Garcia Comesaña Xuntako Osasun sailburuak azaldu duenez, neurri horiek 15:00etan sartuko dira indarrean eta asteartean berrikusiko dituzte. Asteburua dela eta, "hirietako sarrerak eta irteerak mugatzeko" asmoa dutela esan du.

Galiziak 696 positibo zenbatu ditu COVID-19agatik azken 24 orduetan.

Kasu aktiboen kopurua gora egiten ari da. Guztira, 8.363 positibo zenbatu dituzte Galizian, aurreko zenbaketan baino 433 gehiago.