Eli Lilly farmazia-konpainiaren sendagai esperimentala erabiltzea baimendu dute AEBn

Ameriketako Estatu Batuetako Elikagai eta Sendagaien Administrazioak (FDA ingelesez) Eli Lilly farmazia-konpainiak garatu duen sendagai esperimentalaren erabilera premiaz baimendu du. Terapia hori COVID-19aren antigorputzekin batera emango dute, eta Regeneronek egindakoaren antzekoa da.

Botikak Bamlanivimab du izena, eta AEBko Gobernuak 300.000 dosi erosi zituela adierazi zuen Trumpek urriaren amaieran.

Antigorputzekin egindako terapia hau koronabirusa diagnostikatu berri dieten gaixoei dago zuzenduta; ospitaleratu dituzten pazienteei edota oxigenoa behar dutenei, ordea, ez diete emango, horrelako kasuetan botikak ez baitu eraginkortasunik izan.

Patologia kronikoren bat izan duten 65 urtetik gorako pazienteentzat, ordea, onuragarria izan daitekeela baieztatu dute.

FDAren aburuz, “sendagai esperimental honen eraginkortasuna ebaluatzen jarraitzen ari diren arren, entsegu klinikoetan baieztatu da COVID-19ari lotutako ospitaleratzeak murriztu egin direla Bamlanivimab botikari esker”.

Trumpen Gobernuarekin adostu bezala, farmazia-konpainia estatubatuarrak 300.000 dosi eman beharko dizkio AEBko Administrazioari; 375 milioi dolar ordaindu beharko dituzte bi hilabeteren buruan, kontratuan adostutakoaren arabera.

Akordio hori “Warp Speed” programaren parte da, eta koronabirusaren aurkako txertoak eta terapiak ahalik eta azkarren lortzea dute helburu.

Trumpen arabera, Eli Lillyren terapia onenetarikoa da pandemiari aurre egiteko. Presidentea gaixotu zenean, Regeneron enpresaren terapia batekin tratatu zuten. Farmazia-konpainia honek ere premiazko baimena eskatu du. Horrez gain, Gilead Siences konpainiaren Remdesivir botika antibirala ere erabili zuten Trump tratatzeko. Azken sendagai horrek koronabirusa duten gaixoak tratatzeko baimena lortu berri du.

Bamlanivimab botika premiaz baimentzeaz gainera, Ameriketako Estatu Batuetan 10 milioi kutsatu eta 238.000 hildako baino gehiago zenbatu dituzte jada, munduko beste edozein herrialdetan baino gehiago.

Pfizer farmazia-konpainiak ere berriki aditzera eman duenez, COVID-19aren aurka egindako txertoaren entseguetan % 90eko eraginkortasuna duela baieztatu dute.