Abisu horia ezarri dute larunbaterako Araban, izotzagatik

Eusko Jaurlaritzako Segurtasun Sailak abisu horia ezarri du larunbat honetarako, izotza egitea aurreikusi duelako Araban.

Izotzari dagokion abisua gauerditik larunbateko 09:00ak arte egongo da indarrean.

Euskalmeten eguraldi iragarpenaren arabera, larunbatean giro hotza baina eguzkitsua izango da nagusi. Egunaren hasieran lanbroa eta lainoa izango da hainbat lekutan, baina goizean bertan desegin eta eguzkitsu geratuko da denean. Haizeak ekialdetik joko du eta giroa, beste behin, hotza izango da, nahiz eta tenperatura maximoak pare bat gradu igo daitezkeen. Minimoak apur bat jaitsiko dira eta goizaldean eta goizeko lehen orduetan tenperatura zeroz azpitik jaitsi daiteke barrualdean.

Igandean giro eguzkitsuarekin jarraituko dugu. Haizeak hegotik joko du eta baliteke iparraldean apur bat epeltzera egitea. Hala ere, tenperatura ez da askorik igoko. Egunsentia hotza izango da berriz ere, eta Araba eta Nafarroan izotza bota dezake. Lehen orduetako lainoa desegin ostean, zerua garbi geratuko da. Ebro ibarrean, ostera, ez da baztertzen laino hori iraunkorra izatea.