Gabonetan oparitzen diren txakurren erdiak abandonatu egiten dira

Real Sociedad Canina de España (RSCE) elkarteak salatu duenez, Gabonetan oparitzen diren txakurren erdiak abandonatu egiten dituzte, maskota batek duen erantzukizunari buruzko kontzientziazio faltagatik. Horren arabera, animalia horiek gutizia edo bulkada gisa oparitzen dira, benetako konpromisoa eskatzen duela nabarmendu beharrean.

Hori dela eta, RSCEk "Para toda la vida" kanpaina abiatu du, txakur bat edukitzeak dakarren konpromisoaz kontzientziatzeko asmoz. Animalia hori "ez da Gabonetako oparia", "bizitza osorakoa" baizik, horren arabera.

Antolatzaileek adierazi dutenez, "txakur bat izateak konpromiso afektiboa ez ezik, ekonomikoa ere eskatzen du; izan ere, batez beste, txakurraren mantenurako 1.250 euro inguru behar dira urtean, elikadura, albaitaritza, ile-apainketa eta gainerako zainketen artean". Halaber, animaliaren ezaugarriei eta izaerari buruz informatzeko beharra azpimarratzen dute; izan ere, baliteke txakurraren ezaugarriak eta izaera ez izatea egokienak balizko jabearen bizimodurako.

RSCEren ustez, aurten txakurren eskaria aurreko urteetan baino handiagoa izango da pandemiaren ondorioz. Eskaera horrek gora egin zuen berrogeialdian, eta, ondorioz, % 25 hazi ziren abandonuak maiatzean, konfinamendua amaitu zenean.

Julian Hernandez erakundeko presidenteak azpimarratu duenez, Gabonetan "inoiz baino gehiago jakin behar dugu erabaki horrek zer ondorio duen eta horretarako prest gauden. Txakur bat edukitzea ez da jolasa".

Affinity Fundazioaren datuen arabera (2019), Europan urtero txakur abandonu gehien zenbatzen dituzten estatuetako bat Espainia da, 183.000 txakur abandonatzen baitira bertan.