Gizartea -
Gipuzkoa
Giza gorpuzkiak aurkitu dituzte Oiartzungo Landabarren industrialdean
Ikerketa abiatu dute jazotakoa argitze aldera, baina, lehen hipotesien arabera, ez omen du gertaera kriminal batekin zerikusirik.
L.Z. | EiTB MEDIA
Giza gorpuzkiak aurkitu dituzte ostegun honetan Oiartzungo (Gipuzkoa) Landabarren industrialdean, Segurtasun Sailak jakitera eman duenez. Iturri berak zehaztu du, lehen hipotesien arabera, jazotakoak ez omen duela gertaera kriminal batekin zerikusirik.
07:30ean jaso du abisua Ertzaintzak. Dirudienez, bidean bertan aurkitu dituzte giza gorpuzkiak.
Gauzak horrela, ikerketa abiatu dute gertatutakoa argitze aldera, baina badirudi ez dela hilketa bat izan.
Antza denez, "ibilgailu handi" bat egon liteke inplikatuta. Dena den, oraindik ere hipotesi guztiak zabalik daudela zehaztu du Segurtasun Sailak.
Gorpuzkiak aurkitu dituzten lekura Ertzaintza, mediku forentsea eta epaile bat bertaratu dira, eta Auzitegiko Medikuntzaren Institutuan aztertuko dituzte orain.