Gizartea -
Trafikoa
EAEko eta Nafarroako mendate guztiak zabalik daude
Nafarroako bigarren mailako sarean bakarrik daude itxita errepide batzuk eta kateak behar dira.
AGENTZIAK | EITB MEDIA
EAEko mendate guztiak irekita daude eta ez dira katerik behar, baina kontuz ibili behar da, Eusko Jaurlaritzako Segurtasun Sailak jakitera eman duenez.
Hala, Aiurdin, Altube (AP-68), Andatzarrate (GI-2631), Azazeta (A-132), Barazar (N-240), Barrerilla (A-2521), Dima (BI-2543), Elosua (GI-3750), Etzegarate (N-1), Gasteizko mendatea (A-2124) eta Gatzaga (GI-3312) mendateetan kontuz ibiltzea gomendatu dute agintariek.
Astelehen honetako lehen orduan, elurra eta izotza direla eta, Opakua eta Urduña mendateak itxi behar izan dituzte, eta Herrera, Kurtzeta eta Zaldiaranen (Gasteiz), berriz, kateak besterik ezin ziren erabili.
Bestalde, Nafarroako errepide-sare nagusia erabat irekita dago, Leitzarango autobidean (A-15) Donostiarako zirkulazioa berrezarri ondoren. Errepide hori itxita egon 9:00ak arte kamioi bat gurutzatuta zegoelako, Areso parean, errepidean pilatutako elurraren ondorioz.
Bigarren mailako errepide sarean itxita daude elurragatik: NA-138 Iruñea-Frantzia (Alduides) 5. kilometrotik; NA-137 Burui - Isaba - Frantzia 55. kilometrotik; NA-1740 Irurita - Eugi 10. kilometrotik; NA-2011 Salazar - Frantzia 7. kilometrotik; eta NA-2012 Ochagavia - Irati 7. kilometrotik, Nafarroako Gobernuak jakinarazi duenez.
Gainera, neguko kateak edo pneumatikoak beharrezkoak dira sei errepidetan: Burgi eta Isaba lotzen dituena (NA-137) 45. kilometrotik aurrera, Garde eta Anson (NA-176) 8. kilometrotik, Olague eta Zubirin (NA-2520) 4. kilometrotik, Isaba eta Zuriza errepidean (NA-2000), eta Ochagavia- Irati (NA-2012) artean. Baita Aralarko San Migel mendatekoa ere (NA-7510) 6. kilometrotik.
Nafarroako Gobernuak zuhurtzia handiz gidatzeko gomendatu die gidariei, baldin eta Foru Erkidegoko iparraldeko errepideetan zirkulatu behar badute; izan ere, eguraldi txarra espero dute, eta horrek elur-prezipitazioak eragin ditzake datozen orduetan 500 metrotik gora (800-900 metrora igoko da pixkanaka).
Tenperatura baxuak ere erregistratu dira, errepidean izotz-plakak sortzea eragin dezaketenak.