Kostaldea alarma gorrian egongo da goizaldean nabigaziorako arriskuagatik

Euskalmetek gauerdirik aurrera aktibatuko du alarma gorria nabigaziorako arriskuagatik itsasoko lehenengo bi milietan, eta alerta laranja olatuen inpaktuagatik kostaldean. Biak igandeko 9:00ak arte egongo dira aktibatuta.

Olatuaren altuera adierazgarriak 7 metroak gaindituko ditu, eta mendebaldeko eta ipar-mendebaldeko haizeak, 7-8ko indarrarekin, itsaso oso zakarra edo itsaso handia eragingo du. Beraz, alarma gorria egongo da aktibatuta, nabigaziorako arriskuagatik. 9:00etatik aurrera alerta laranja bilakatuko da, eta 15:00etan abisu horian geratuko da.

Astelehenean, ordea, berriz aktibatuko da alerta laranja. Olatuaren altuera adierazgarriak 5 metroak gaindi ditzake.

Kostaldeko inpaktuari dagokionez, Euskalmetek ohartarazi du pasealeku eta malekoietan zipriztin eta olatu-zaparrak eroriko direla, eta olatuek itsasertza gaindituko dutela itsasgoraren inguruan. Goizeko itsasgora 6:11n izango da, eta, orduan, itsas-uholdeak garrantzitsuak izango dira. 9:00etatik 20:00etara, abisu horia bilakatuko da, eta astelehenean zehar ere berriz aktibatuta egongo da.

Abisu horia haizeagatik Kantauri isurialdean

Gainera, Bizkaian eta Gipuzkoan abisu horia egongo da aktibatuta haizeagatik, gauerditik 9:00etara. Haizeguneetan, haize-boladek 100 km/h-ko abiadura gaindi dezakete, bereziki kostaldean. Bertan 110 km/h-koa gaindi dezakete. Haizeguneak ez diren tokietan, 80 km/h-tik gorako abiadura izan dezakete haize-boladek.

Aemetek ere abisu horia aktibatu du igandeko 9:00etara arte, 80 km/h-ko haize-boladengatik, Nafarroako Kantauri isurialdean. Astelehen goizean, abisu horia Pirinioetara zabalduko da, 9:00ak arte, eta foru erkidegoko erdialdera, 8:00ak arte.

Azkenik, Pirinioetan abisu horiarekin jarraitzen dute elurragatik, igandeko 8:00ak arte. 1100 metrotik gora 5 zentimetrokoa izan daiteke elur pilaketa 24 orduetan.