66 positibo erregistratu dituzte Nafarroan, eta positibo tasa % 4,5era igo da

Azken egunean 66 covid-19 kasu berri erregistratu dira Nafarroako Foru Erkidegoan, atzo (58) eta aurreko igandean (45) baino gehiago, Gobernuak emandako behin-behineko datuen arabera.

Astean zehar gora egin dute positiboek, eta gaurko datuarekin baieztatu egin da joera.

1.477 proba diagnostiko egin dira larunbatean, PCR zein antigeno testak. Positibo tasak ere, beraz, gora egin du, eta % 4,5ekoa da, aurreko egunetan baino altuagoa.

Bestalde, Nafarroako ospitaleetan 76 gaixo daude, aurreko egunean baino lau gehiago. Atzo bost ospitaleratze izan ziren koronabirusarekin lotuta, horietako bat ZIUn.

Azken egunean ez da hildakorik egon, eta ez da aurreko egunetako heriotzarik notifikatu. 1.108 dira covid-19ak pandemia osoan zehar Nafarroan eragindako heriotzak.

Eremuei dagokienez, Iruñean eta eskualdean kasu positiboen % 62 erregistratu dira, Tuterako eremuan % 24 eta Lizarrakoan % 2. Beste positiboak (% 12) Nafarroako beste eremuetan zehar banatzen dira.

Adinari dagokionez, 15-29 urteko adin tartean daude kasu gehienak (% 33). Ondoren datoz 45-59 urtekoak (% 26), 30-44 urtekoak (% 18) eta 60-75 urtekoak (% 12). Azkenik, 15 urtetik beherakoak (% 8) eta 75 urtetik gorakoak (% 3) daude. Positibo berrien batez besteko adina 39,5 urtekoa da. Sexuari dagokionez, positiboen % 52 gizonezkoak dira eta % 48 emakumezkoak.

Ospitaleen egoerari dagokionez, 76 pertsona daude covid-19arekin edo covid-19agatik Nafarroako ospitaleetan ingresatuta (atzo baino lau gehiago). Horietatik, 15 zaintza intentsiboetako unitateetan daude (atzo baino bat gehiago) eta 10 etxean (bi gehiago). Besteak, 51 paziente, gela arruntetan daude (bat gehiago). Horiek guztiek positibo eman dute PCR proba batean, koronabirusa ingresatuta egoteko arrazoia izan ala ez, eta covid-19ari erreserbatutako espazioetan daude.

Birusaren intzidentzia metatua 51.752koa da Nafarroan.

Txertaketa prozesuari dagokionez, atzo 1.086 dosi jarri ziren. Guztira, beraz, 76.997 txerto jarri dira, jasotako 84.845 txertoetatik. 25.124 pertsonari jarri dizkiete bi dosiak.

Positibo berriek behera egin dute EAEn

Azken egunean 247 covid-19 kasu positibo berri erregistratu dira Euskal Autonomia Erkidegoan. Positibo tasa % 4,3koa da, hau da, atzoko bera.

Guztira covid-19a duten 120 gaixo larri daude gaur, atzo baino bost gehiago.