Euskadi, alerta gorrian 140 km/h-ko haizeteengatik

Eusko Jaurlaritzako Herrizaingo Sailak  alerta gorria ezarri du ostiralerako aurreikusi dituzten haizete gogorrak direla eta. Haize ufadek 140 kilometro ordurainoko abiadura har dezakete zenbait unetan EAEko mendebaldeko hainbat tokitan.

Euskalmetek egindako aurreikuspenen arabera, Nerbioi ezkerraldea, Uribe Kosta, Enkarterriak, Aiara bailara eta Matxitxako izango dira batik bat, haizeak gehien astinduko dituen guneak.

Alerta gorrian dauden inguru horiez gain, EAEko gainerako toki guztietan alerta laranja ezarri dute. Gaur gauetik bihar eguerdirarte haizeak zakar joko baitu orohar.

Haizearen ondorioz, Loiuko aireportuan Madrilerako, Pariserako eta Municherako hegaldi guztiak bertan behera utzi dituzte.

Halaber, olatu eta haize denboralearen ondoren, asteburuan, elurra iritsiko da. Hala, ostiraleko 15:00etatik larunbateko 18:00ak arte, elurraren maila1.000 metrotan kokatuko da. Goizaldeko 06:00ak aldera, berriz, elurmaila 600-700 metroraino jaitsi daiteke.

Larunbatean, euria, ekaitzak eta txingorra izango dira nagusi. Baliteke 60 litro metro karratuko pilatzea.

Olatuen inguruko alerta laranja

Itsasoan, olatuen arrisku maila apur bat baretu dela eta Herrizaingo Sailak alerta gorriaren maila laranja kolorera jaitsi du. Aurreikuspenen arabera, olatuak 5-7 metro artekoak izango dira.

Alerta gorria eguerdia arte egon da aktibatuta.  Gauerditik aurrera itsasoa oso zakar ibili da eta zazpi metrorainoko olatuak sortu dira kostaldean. Matxitxakon berriz, itsas barruan, 12 metrorainoko olaturen bat edo beste ere izan da.

Dena den, arrisku handiko uneak aurreikusita bazeuden ere, itsasoak ez du beste zenbaitetan adina arazo sortu eta ez da kalte esanguratsurik izan.

Gertakizunak

Denboralearen ondorioz gizonezko bat zauritu da Donostian. Paseo Berrian zebilela olatu handi baten kolpea jasan du eta belauna hautsi du.

Gertakaria 08:30etan jazo da. Anbulantzia batek Donostiako Paseo Berrian sartu behar izan du gizona artatzeko. Antza, zauritua Urgull mendiaren parean zegoen, Oteizaren eskulturaren inguruan. Olatu handi batek bete betean harrapatu eta lurrera bota du.

Larrialdi zerbitzuek Donostiako Paseo Berrian zeuden beste herritar batzuk ere artatu behar izan dituzte. Paseoa atzotik itxita dagoen arren, herritar asko bertan sartu dira olatuak gertutik ikusteko.

Horrez gain, Donostiako udaltzainek Urumea ibaian zebiltzan hiru surflari erreskatatu behar izan dituzte. Aurretik, bertan ez sartzeko ohartarazi diete agenteek, baina, surflariek entzungor egin diote aginduari.

eguraldiaren egoera webkamak argazkiak elkartrukatu