Tratamendu batek kimioterapia saihestuko du bularreko minbizia duten pazienteetan

RxPONDER izeneko nazioarteko ikerketak, Donostia ospitalearen eta Onkologikoa zentroaren parte-hartzea izan duenak, bularreko minbizia duten pazienteen ehuneko esanguratsu bati kimioterapia alboratzeko aukera emango die, eta horrela tratamendu horren ondorio kaltegarriak saihestuko dituzte.

Azpitalde horretan daude hormona-hartzaile positiboak (RH+) eta HER2 negatiboa dituzten emakume postmenopausikoak. Bularreko minbizi mota ohikoena da, batetik hirura arteko besapeko gongoil kaltetu eta Recurrence Score proban 25eko edo gutxiagoko emaitza dutenena. Orain arte kimioterapia eta hormonoterapiaren konbinaketarekin tratatu izan dituzte eta, ikerketaren arabera, hormonoterapia soilik erabiliz, eraginkortasun eta pronostiko berdinarekin tratatu ahal izango dituzte.

Emilio Alba doktore eta ikerketaren Espainiako ikertzaile nagusiaren hitzetan, emaitzek agertu dutenez, tumore hori eta bat eta hiru gongoil artean kaltetuta dituzten emakumeei kimioterapia kentzeak "ez du pronostikoa okertzen". Hala, urtero estatuan 5.300 kasu berri inguru izan ohi dituen paziente-talde honetan, "posible da kimioterapia bidezko tratamendua saihestea".

Guztira, 5.083 pazientek hartu dute parte ikerketan, eta % 67 postmenopausikoak ziren. Euskal zentroetako 70 pazienteen kasuan, erdia baino gehiago talde postmenopausiko horren parte da. Aipatutako baldintzak kontuan izanez gero, hormonoterapia soilik jaso lezakete.