Gizartea -
epaia
Bost urteko zigorra Jose Luis Lancharen heriotza eragin zuen erasotzailearentzat
Akusatuak gertatutakoa onartu du, eta bost urteko kartzela-zigorra betetzearekin eta zentro psikiatriko batean 14 urteko egonaldia egitearekin ados dago.
eitb media
Gipuzkoako Auzitegiak bost urteko kartzela-zigorra ezarri dio 2019an Jose Luis Lancha errenteriarrari heriotza eragin zion erasoatzaileari, baita zentro psikiatriko batean 14 urteko egonaldia ere.
Datorren astelehenean hasi behar zuen epaimahaiaren auzitegi batek gertaerak epaitzen, baina, bistaren aurretik, akusatuak gertatutakoa onartu du. Horrekin batera, bost urteko kartzela-zigorra betetzea eta zentro psikiatriko batean 14 urteko egonaldia egitea onartu ditu. Beraz, ez da beharrezkoa izango epaiketa egitea.
Hasieran, Gipuzkoako Fiskaltzak bederatzi urte eta 11 hilabeteko zigorra ezartzea eskatu zuen, baita zentro psikiatriko batean 15 urteko egonaldia ere, homizidio delitua egotzita eta buruko alterazioa inguruabar salbuesle ez-oso gisa onartuta. Dena den, Ministerio Publikoak eta akusazio partikularrak zigorra murriztea adostu dute, eta akusatuak onartu egin du.
2019ko ekainaren 16an gertatu zen guztia. Jose Luis Lancha Donostiako Ategorrieta etorbidetik oinez zihoala, auzipetua gerturatu zitzaion, zerbait esatera. Lanchak ez jarraitzeko eskatu zionean, auzipetuak zenbait ukabilkada eman zizkion, lurrera erori zen arte, eta buruaren atzealdea asfaltoaren kontra kolpatu zuen.
Erasoaren ostean, auzipetuak bertatik alde egin zuen eta biktima (61 urte zituen) ospitalera eraman zuten. Koma egoeran egon zen, ekainaren 17an hil zen arte, erasoak eragindako lesioen ondorioz.
Fiskaltzaren akusazio idatziaren arabera, psikiatrian espezializatutako auzitegi-medikuek akusatua aztertu dute, eta ondorioztatu dute "alkohol kontsumoak eragindako nahasmendua" eta "marihuana kontsumoak eragindako nahasmendua" dituela. Gainera, "nahasmendu psikotiko kronikoa" ere badu, eta horrek, diotenez, "gogoetarik gabe indarkeriaz erantzuteko joera eragiten dio, eta besteentzat arriskutsua izan daiteke".
Era berean, adituen ustez, "harremana dago patologia horren eta egindako delituaren artean, eta horrek bere adimen-gaitasunean zein borondatean eragin dezake, neurri batean".