151 pertsona identifikatu dituzte legez kanpoko festa batean, Iruñean

Udaltzaingoak jakitera eman duenez, covid-19agatik ezarritako osasun neurriak urratu zituzten.

EITB MEDIA

publikatuta: 2021/05/16 11:12 (UTC+2)

azken eguneratzea: 2021/05/16 17:57 (UTC+2)

Legez kanpoko makrofesta batean parte hartzen ari ziren 151 pertsona identifikatu zituzen, atzo, Iruñeko Etxabakoitz auzoan.

Nafarroako hiriburuko Udaltzaingoak ohar bidez jakitera eman duenez, inguruko bizilagunek eman zuten abisua, eta poliziak bertaratu zirenean, covid-19agatik ezarritako osasun neurriak urratzen ari zen jende multzo handi bat ikusi zuten. Ondorioz, dispositibo berezi bat ezarri zuten, bertan zeudenak identifikatzeko eta festa bertan behera utzi arazteko.

Iruñeko bost tabernen kontrako salaketak ere jarri zituzten, hainbat neurri urratzeagatik.

Oso poliki bada ere, covid-19aren kutsatze kopurua beheraka doa Nafarroan; atzo, larunbata, 69 koronabirus kasu berri zenbatu ziren, bezperan baino 6 gutxiago, Foru Gobernuko Osasun Sailak zabaldutako behin behineko datuen arabera. Duela astebeteko (maiatzak 8) datuekin alderatuta, berriz, 32 kutsatze gutxiago erregistratu dira.

Kontuan izan osasun agintariek koronabirusaren aurrean eman dituzten aholkuak. Gaitzaren sintomarik baduzu, EAEn bizi bazara, osasun-zentrora deitu, eta zalantzarik izatekotan, Osasun Batzordearen telefonoa duzu eskuragarri: 900 20 30 50. Nafarroan bizi bazara, berriz, Osasun Batzordearen telefonora dei dezakezu: 948 290 290. Gogoratu covid-19a ez hedatzeko modurik eraginkorrena musukoa erabiltzea, espazioak aireztatzea, segurtasun-distantzia gordetzea eta eskuak sarri garbitzea dela.

Hau zure interesekoa bada, baliteke beste gai hauek ere izatea

Iruñea Nafarroa Gizartea Eguneko albisteak Albisteak Nafarroako Gobernua ETB Nafarroa Iruñeko Udala Nafarroako Ospitale Gunea Koronabirusa Osasunbidea

151 pertsona identifikatu dituzte legez kanpoko festa batean, Iruñean

Esteka kopiatuta