Gizartea -
KORONABIRUSA
Gizarte Langintzako profesionalek txertaketa prozesuan azkenak izatea salatu dute
Gipuzkoako Gizarte Langintzaren Elkargo Ofizialak kolektiboak pairatzen duen "diskriminazioa" konpontzeko eskatu die agintariei.
EITB MEDIA
Gizarte Langintzako profesionalek esan dute eurena "funtsezko lanbidea" dela, eta "pandemiaren aurkako lehen lerroan" urtebete eman ostean, covid-19aren aurkako txertaketa prozesuan azkenak izatea salatu dute.
Gipuzkoako Gizarte Langintzaren Elkargo Ofizialak (700 profesional baino gehiago biltzen ditu) salatu du txertaketa-egutegian kolektibo horrek beste langile batzuekin alderatuta bizi duen "justifikaziorik gabeko bidegabekeria".
"Osasun arloko edo arlo soziosanitarioko langileek eta Gipuzkoako Foru Aldundiarekin hitzarmena duten zerbitzu batzuetakoek txertoa jaso badute ere, gure profesional gehienek ez dute oraindik txertoa jaso", azaldu du.
Hala, kolektibo horrek jasaten duen "diskriminazioa" konpontzeko eskatu die agintari eskudunei, eta funtsezko profesionalei dagokien txertaketa-taldean, esposizio arrisku handiena duten langileen taldean, sartu behar zituztela azpimarratu du.
Horren esanetan, profesional horiek kutsatuak izateko arriskua dute, egunean zehar pertsona askorekin egiten baitute lan, baina, horrez gain, "kutsatzeko foku handi bat" izan ahal dira.
