Gizartea -

Koronabirusa

Musukoa ez da derrigorra izango aire librean hilaren 26tik aurrera Espainian

Pedro Sanchez Espainiako gobernuburuak iragarri du ostegunean ministroen kontseiluan hartuko dutela erabakia, eta larunbatean sartuko dela indarrean neurria.

Bi emakume maskararekin. Artxiboko argazkia: EFE
Bi emakume maskararekin.
Ekainaren 26tik aurrera musukoa ez da derrigorrezkoa izango aire librean

1:28

E. G. | EITB MEDIA

Whatsapp Facebook Twitter Telegram Email

Badago data: ekainaren 26a, larunbatarekin. Egun horretatik aurrera musukoa ez da derrigorrezkoa izango Espainiako Estatuan. Hala iragarri du Pedro Sanchez Espainiako presidenteak. Horrenbestez, aire zabalean maskararik gabe ibili ahalko dira Hego Euskal Herriko biztanleak. Ipar Euskal Herrian ekainaren 17tik da horrela.

Sanchezek Bartzelonan egin du iragarpena Kataluniako enpresaburuen batzarrean. Azaldu duenez, ostegunean, hilaren 24an, ministroen kontseilua deituko du eta bertan hartuko dute erabakia. Dena dela, neurria larunbatean sartuko da indarrean.

"Hauxe izango da aire zabalean maskara jantzita ibili beharko garen azken asteburua", nabarmendu du Espainiako presidenteak. Musukoa aire zabalean kentzea posible izango da, haren hitzetan, ezarritako helburu guztiak betetzen ari direlako.

"Gure kaleak, gure aurpegiak, beren itxura normala berreskuratzen hasiko dira datozen egunetan", gehitu du Pedro Sanchezek.

Gaur goizean, Iñigo Urkullu lehendakariak Euskadi Irratiko "Faktoria" saioan argi eta garbi azaldu du bere bide-orria. Urkullu itxaropentsu mintzatu da, egoerak neurriak malgutzeko aukera ematen duelako. Gaineratu duenez, berandu baino lehen etor liteke maskararen erabilera arintzea.

Nafarroako Gobernuak ere maskararen erabilera arintzea aurreikusi du eta esana zuen uztailetik aurrera bere erabilera malgutuko zela kanpoaldean.

Iñigo Urkullu lehendakariaren arabera, "desberdindu egin behar da kanpoaldea eta barrualdea. Kanpoaldean musukoa erabiltzeko askatasuna ematen bada, kontuan hartu behar da kanpoan jende kopuru bat bilduz gero, beharrezkoa izango litzatekeela. Eta beharrezkoa izaten jarraituko duela barrualdean".

Gainera, Pedro Sanchez Espainiako gobernuburuak kanpoaldean musukoak kanpoaldean derrigorrezkoak izateari utziko diotela iragartzeko erabili duen "modua" deitoratu du Urkulluk. Zentzu horretan, "oraindik irmoak ez diren eta Lurralde arteko Osasun Batzordean eztabaidatu beharreko proposamenak" komunikabideen bidez jakitera ematea kritikatu du EAEko buruzagiak.

Kontuan izan osasun agintariek koronabirusaren aurrean eman dituzten aholkuak. Gaitzaren sintomarik baduzu, EAEn bizi bazara, osasun-zentrora deitu, eta zalantzarik izatekotan, Osasun Batzordearen telefonoa duzu eskuragarri: 900 20 30 50. Nafarroan bizi bazara, berriz, Osasun Batzordearen telefonora dei dezakezu: 948 290 290. Gogoratu covid-19a ez hedatzeko modurik eraginkorrena musukoa erabiltzea, espazioak aireztatzea, segurtasun-distantzia gordetzea eta eskuak sarri garbitzea dela.

Hau zure interesekoa bada, baliteke beste gai hauek ere izatea
Espainiako Gobernua albisteak Espainia argazkiak Gaixotasunak Pedro Sánchez bideoak Gizartea albisteak Eguneko albisteak Gaurko azken orduko albistea Osasun albisteak COVID olatu berria Maskarak gaur