Zornotzan jipoitutako gaztearen aita: "Alexandru oso larri dago"

Gurutzetako Ospitalearen ate aurrean, Zornotzan (Bizkaia) jipoitutako gaztearen aitak, Eugen Ionitak, semea ikusi ahal izan duela azaldu die hedabideei, eta biktimak oso larri jarraitzen duela baieztatu du. "Alexandru oso larri dago", adierazi du hunkituta.

Gainera, biktimaren aitak jakitera eman duenez, gazteari asteazkenean ebakuntza egin zioten. Orain datozen orduetako bilakaeraren zain daude, baina "baikorrak" direla erantsi du.

Igandean pertsona talde batek jipoitu zuen 23 urteko gazteak larri jarraitzen du Gurutzetako ospitalean.

Goizaldeko hirurak aldera, biktimak gazte talde baten hainbat kolpe jaso zituen; erasotzaileetako asko adingabeak dira. Erasoa grabatu egin zuten, eta sare sozialetan bolo-bolo dabil horren bideoa.

Gaztea Gurutzetako ospitalera eraman zuten, eta bertan jarraitzen du, larri. Bestalde, Ertzaintzak, Zornotzako Udaltzaingoarekin elkarlanean, gertakarien inguruko ikerketa abiatu du, eta dagoeneko zortzi pertsona atxilotu ditu, bost adingabe tartean.