Gizon bat atxilotu dute Ziburun, emakume bati laban batekin eraso egitea egotzita

Frantziako Poliziak gizonezko bat atxilotu du Ziburun (Lapurdi), joan den ostiralean emakume bati laban batekin eraso egin ziolakoan. Biktimak Baionako Ospitalean dago ingresatuta, arriskutik kanpo.

Gizonak ostiralean egin zion eraso, 02:00ak aldera; biktimak bere autoa aparkatu zuenean, harengana hurbildu eta buruan jo zuen. Ondoren, ganibet batekin, hamar labankada egin zizkion. Poliziak jakitera eman duenez, erasotuak eta erasotzaileak ez zuten elkar ezagutzen.

Bizilagun batek gertatutakoa ikusi eta abisua eman zien segurtasun indarrei. Erasotzaileak ihes egin zuen, labana eskuan zuela.

Hasiera batean, poliziek ezin izan zuten gizonezkoa harrapatu, baina, azkenean, hura atxilotzea lortu dute. Orain, Baionako Polizia Judizialaren esku dago ikerketa Fiskaltzaren aginduz, eta homizidio saiakera egotzi diote ustezko erasotzaileari.