Itxi

2021/09/24

15:57

Gizartea

La Palmako sumendia

Espainiako Gobernuak hondamendi eremu izendatuko du La Palma irla

AGENTZIA | EITB MEDIA

Gainera, 'berreraikitze plan berezia' lantzen ari direla epe labur eta luzerako iragarri du Pedro Sanchez Espainiako Gobernuko presidenteak.

  • La Palmako (Kanariar Uharteak) sumendia. Argazkia: EFE

    La Palmako (Kanariar Uharteak) sumendia. Argazkia: EFE

  • Whatsapp
  • Whatsapp
  • Telegram
  • Bidali

Pedro Sanchez Espainiako Gobernuko presidenteak ostiral honetan La Palman iragarri duenez, irla Babes Zibileko larrialdiak bereziki kaltetutako eremua deklaratuko dute datorren asteartean Ministroen Kontseiluan, Cumbre Viejako sumendiaren erupzioa jasan ondoren. Aldi berean, "Berreraikitze plan berezia" lantzen ari direla ere adierazi du, epe labur eta luzera begira.

"Erakundeak arazoak konpontzeko gaude hemen", esan du Sanchezek Kanarietako Gobernu Kontseiluan parte hartu ostean, eta larrialdian parte hartu duten alde guztien "koordinazio bikaina" azpimarratu du.

Era berean, irlaren susperraldiari eta berreraikitzeari aurre egiteko premiazko eta berehalako neurriak ezarriko dituztela iragarri du, baita batzorde misto bat ere.

Etorkizuneko planak "ziurtasuna" emango die herritarrei, larrialdiak eragindako babes zibileko eremu izendaturik. Premiazko neurriak ere izango dituzte, erupzioa amaitu arte "itxaron gabe"; eta "berreraikuntzarako" egiturazko neurriak, erupzioa amaitzen denean.

Presidenteak larrialdi batzordean lan egiten duten pertsona guztien lan eta profesionaltasun bikaina goraipatu du eta Kanarietako Gobernuak erakutsi dion harrera eta abegikortasuna eskertu du.

Neurriak

Irtenbideei dagokienez, Espainiako Gobernua "lanean" ari dela 'La Palma irla berreraikitzeko Plan Berezia' garatzen iragarri du Sanchezek. Horretarako, batzorde misto bat eratu dutela iragarri du, administrazioaren maila guztiak barneratuz: gobernukoa, autonomikoa, irlakoa eta tokikoa.

Presidenteak aurreratu duenez, plan horrek bi neurri sorta jasoko ditu, batzuk azkarrak eta berehalakoak, uharteetakoek egunerokotasunean jasaten dituzten kalteak arintzeko, eta, bereziki, dena galdu duten herritarren beharrak arintzeko; beste batzuk, berriz, etorkizunean uharteari erantzun bat emateko.

Berehalakoen artean, datorren asteartean Ministroen Kontseiluak La Palma irla Babes Zibileko larrialdi batek bereziki kaltetutako zonalde gisa izendatzea onartuko duela gaineratu du, hondamendi eremu deitzen zaiona.

Hala, kaltetuei etxebizitzak errazteko, egunerokotasunerako behar dituzten gauzak erosteko, ureztatze sistemaren hornidura bermatzeko, mugikortasuna berrezartzeko eta pertsonen eta merkantzien garraioa bermatzeko neurriak hartuko dituztela gaineratu du.

Bestalde, sumendiak kaltetutako pertsonentzako aldi baterako lan-erregulazioko araudia martxan jarriko dutela esan du, bereziki, "uhartean hain garrantzitsua den" nekazaritza sektorearentzat.

Epe luzera, Ministroen Kontseilura eramango duten Errege Dekretua lantzen ari direla aurreratu du, eta Kanarietako Gobernuak, kabildoak, udalerriek eta ministerioek "elkarrekin" diseinatuko dutela gaineratu du.

Era berean, "hirigintza neurriak" jarriko dituztela martxan esan du Sanchezek, eta suntsitutako hiriguneak berreraikitzeko baliabideak jarriko dituztela.

Presidentearen hitzetan, "ohiko etxebizitza galdu duten pertsona guztiei behin betiko irtenbide pertsonalizatua emateko neurriak" dira.

Laburbilduz, honako hauek aipatu ditu: berehalako neurriez gain, azpiegituren plan bat jarriko da martxan, uharte osoko mugikortasuna berreskuratzeko; nekazaritza-azpiegituren plan bat, nekazaritza-ustiategietako ureztatze-sarea berreskuratzeko; plan energetiko bat, irlako eremu babestuenetarako garraio eta banaketa elektrikoko lineak aurreikusten dituena eta energia berriztagarriak bultzatzen dituena; eta turismoa bultzatzeko plan bat.

  • Bisitatuena

      Kargatzen ikusiena
      Kargatzen ikusiena
    ;