Itxi

2021/10/09

15:15

Gizartea

gaueko aisialdia

Bi gizon atxilotu dituzte Irunen eta Gasteizen erasoak egitea leporatuta, eta biktimetako bat larri dago

eitb media

Zaurituetako bat ZIUn dago orain, larri. Bi erasoen ustezko egileak polizia-etxean daude, eta epailearen esanetara utziko dituzte datozen orduetan.

  • Gasteizko Alde Zaharra. EiTB Mediaren bideo batetik ateratako irudia.

    Gasteizko Alde Zaharra. EiTB Mediaren bideo batetik ateratako irudia.

  • Whatsapp
  • Whatsapp
  • Telegram
  • Bidali

Ertzaintzak bi gizon atxilotu ditu gaur goizaldean Irunen eta Gasteizen, gaueko aisialdiaren testuinguruan izan diren bi erasorekin lotuta. Arabako hiriburuko erasoaren kasuan, pertsona bat larri zauritu dute eta Santiago Apostol ospitaleko ZIUn dago orain.

Goizaldeko 3:00ak aldera izan da azken gertakari hori, Gasteizko Nueva Fuera kaleko ostalaritza lokal batean. Eraso baten berri izan ostean, Ertzaintza bertaratu da eta lurrean inkontziente zegoen gizon bat aurkitu du, sudurretik odola zeriola.

Biktimak hausturak zituen buruan, eta Santiago Apostol ospitalera eraman dute pronostiko larriarekin, lurrarekin burua kolpatzea eragin dion ukabilkada dela eta.

Jarraian, ustezko erasotzailea atxilotu dute, 31 urtekoa, lesio delitua egotzita. Gasteizko Ertzain-etxean dagozkion izapideak amaituta, akusatua epailearen esanetara ipiniko dute.

Bestalde, Irunen Ertzaintzak beste gizon bat atxilotu du hiriguneko lokal batean, gazte bati lesioak egitea leporatuta. Botila batekin buruan kolpatu omen du.

Gertakariak larunbat goizaldeko 3:00ak aldera izan dira. Ertzaintzari ohartarazi diotenez, hiriguneko diskoteka baten ingurumarietan liskarrak izaten ari ziren. Lekura iristean, burua zaurituta zuen gazte bat aurkitu dute agenteek, laguntza medikoa behar zuena.

Biktimak jakinarazi duenez, lokal barruan zegoen erasoaren unean, beste pertsona batekin. Bigarren pertsona horri sakelakoa lapurtzen saiatzen ari omen zen ustezko erasotzailea eta, biktimak egiten ari zena aurpegiratu dionean, zenbait kolpe eman dizkio buruan, zeraman kristalezko botilarekin. Zauri eta kontusio arinak eragin dizkio.

Biktimak erasoaren ustezko egilea antzeman du lokaleko ingurumarietan, eta ertzainek identifikatu eta atxilotu dute, ustezko lesio delitua egotzita. 21 urteko atxilotua polizia-etxera eraman dute. Datozen orduetan epailearen esku utziko dute, Irungo Guardiako Epaitegian.

Zauritutako gizona Bidasoa Ospitalera eraman dute, lesioak tratatzeko.

  • Bisitatuena

      Kargatzen ikusiena
      Kargatzen ikusiena
    ;