Itxi

2021/11/11

16:46

Gizartea

Elikagai Bankua

Bono bidez egingo da aurten ere Gipuzkoako Elikagaien Bilketa Handia, azaroaren 19tik 25era

O.P. | Eitb Media

Elikagaien Bankuak aurreikusten du aurten 21.638 onuraduni hiru milioi kilo elikagai banatzea. Bonuak ohiko supermerkatu laguntzaileetan erosi ahal izango dira, eta ekarpen ekonomikoak ere egin ahal izango dira transferentziaz nahiz Bizumez.

0:24
Elikagaien bilketa. EITB Mediaren bideo batetik ateratako irudia.
  • Whatsapp
  • Whatsapp
  • Telegram
  • Bidali

Gipuzkoako Elikagaien Bankuak azaroaren 19tik 25era bitartean egingo du elikagaien bederatzigarren Bilketa Handia. Aurten ere, iaz bezala, bonoekin bakarrik egingo da kanapaina, eta ez modu fisikoan, covid-19ak sortutako osasun-baldintzen ondorioz. Elikagaien bankuak aurreikusten du aurtengo ekitaldia 21.638 onuradunekin ixtea eta hiru milioi kilo elikagai banatzea, aurreko urtean baino % 35 gehiago.

Donostian aurkeztu dute ekimena Belen Mendez de Vigo Gipuzkoako Elikagaien Bankuko presidenteak, Maite Peña Gizarte politiketako foru diputatuarekin, Nekane Arzallus Gipuzkoako hiriburuko lehen alkateordearekin eta aurten lankidetza berezian arituko den Basque Culinary Centerreko (BCC) zuzendari nagusi Joxe Mari Aizegarekin batera. 

Mendez de Vigok azpimarratu duenez, aurten Gipuzkoako Elikagaien Bankuak iaz baino % 35 elikagai gehiago banatu ditu, bai hileko loteetan, bai eta Europar Batasunak erakunde solidario horren bidez ematen dituen azken minutuko produktuetan ere, hau da, iaz baino 657.000 kilo gehiago. Aurtengo urrira arte 2.494.391 kilo eman dira;   2020an, berriz, 1.837.597 kilo izan ziren.

Gainera, onuradunen kopurua ere % 25 igo da. Hala, aurreikuspenen arabera, hiru milioi kilo elikagai banatzea aurreikusten den ekitaldi honen amaieran 21.638 izango dira onuradunak, eta hori "mugarri berria da Bankuarentzat".

Halaber, azpimarratu du lortu dela hilean pertsonako 12 kilo elikagai banatzeari eustea, hau da, ia 50 kilo hilean lau pertsona dituen familia-unitate batentzat. "Laguntza horrek ez ditu behar guztiak asetzen, baina oso garrantzitsua da", eta, azpimarratu duenez, horren atzean "ahalegin handia, diru asko eta laguntza ugari dago".

Mendez de Vigok azaldu duenez, nahiko luke "gutxienez iazkoa bezalakoa" izatea, orduan 800 000 euro baino gehiago biltzea lortu baitzuten. Hori dela eta, Bilketa Handian parte hartzeko deia egin du emandako laguntzari eutsi ahal izateko, oinarrizko kontsumorako produktuen prezioak, arroza edo olioarena, esaterako, "asko garestitzen" ari diren garaiotan.

Bonuak ohiko supermerkatu laguntzaileetan erosi ahal izango dira, eta ekarpen ekonomikoak ere egin ahal izango dira horretarako prestatutako Kutxabanken eta Laboral Kutxaren kontuen  bidez eta Bizumez, 03980 kodea erabilita.

Peñak txalotu egin du Gipuzkoako Elikagaien Bankuaren lana, lurraldeko "elkartasun indarraren erakusle nagusia" baita, eta boluntarioek egiten duten lan "isila" goraipatu du. Era berean, Arzallusek "elkartasuna" eskatu du, bakoitzaren lana babesten jarraitzeko, lurralde "bidezkoagoa eta solidarioagoa" lortzeko.

BCCren lankidetza

Bestalde, Aizegak Basque Culinary Center-en eta Elikagaien Bankuaren arteko lankidetzaren berri eman du. Lankidetza horren muinean egongo da ikasleak eta jendartea "sentsibilizatzea", bai eta "pertsona askori beren bizitzekin jarraitzeko eta elikagaien xahutzearen aurka borrokatzeko" aukera ematen duen Bankuarentzat dirua biltzea ere.

Adierazi duenez, BCCk bere ikasleen bisitak antolatuko ditu Elikagaien Bankura, bertan boluntario gisa bi egunez lan egin dezaten; erakundearen lanari buruzko hitzaldiak ere eskainiko zaizkie, eta Bankuari laguntzeko bideo informatiboak zabalduko dira BCCren sare sozialetan.

Halaber, zentro honek ongintzazko afari bat antolatu du azaroaren 24rako, 80 bat jankiderekin. 100 euro ordainduko da afaria eta diru hori Elikagai Bankura joango da dohaintza gisa. Ekitaldi horretan 16 ostalaritza-establezimenduk hartuko dute parte, "Gipuzkoako Top" direlakoak, eta oraindik zenbait plaza daude eskuragarri Bankuaren eta BCCren webguneetan.

  • Bisitatuena

      Kargatzen ikusiena
      Kargatzen ikusiena
    ;