Osasun Sailak farmaziak gaitu ditu antigeno testetan atzematen dituzten positiboen berri eman dezaten

Gaurtik aurrera, Euskal Autonomia Erkidegoko (EAE) farmaziek egiten dituzten antigeno testetan atzemandako positiboen berri eman ahalko dute, horretarako gaitu baitu Eusko Jaurlaritzako Osasun Sailak.

Orain arte, testa egiten zuten pertsonek Osakidetzari jakinarazi behar zioten positiboa, webgunean eskegitako inprimaki baten bidez.

Aurrerantzean, botikaren bidez eman ahalko da positiboaren berri, Osasun Sailak ohar batean jakinarazi duenez. Izan ere, farmaziek emango dute horren berri, errezeta elektronikoko inprimaki baten bidez. 

Dena dela, Osakidetzak emaitza hori egiaztatu beharko du. Hori horrela, botikek erregistratzen dituzten datuak EAEko Osasun Sistema Publikoak erabiliko ditu hitzordu bat izapidetu eta beste proba diagnostiko bat egiteko.

Osasun Sailaren arabera, "helburua da botikak inplikaraztea jakinarazpenean, Osasun Sailari kasu positiboen ahalik eta kopuru handienaren berri ematen zaiola bermatzeko".

Isolamendua eta harreman estuen zerrenda

Osasun Sailak gogora ekarri duenez, positibo eman duen pertsona orok, baita txertatuta dagoenak ere, "isolatuta" egon beharko duela, "harik eta emaitza egiaztatu arte". 

Bestalde, gogorarazi dute prebentzio-neurriak bete behar direla, besteak beste: jendetzak saihestea, eskuak garbitzea, espazio itxiak aireztatzea, maskara etengabe erabiltzea eta, jakina, txertaketa.