Anesvadeko zuzendari ohien zigorra gutxitu dute

Fiskaltzak eta akusazio partikularrak 20 hilabetera jaitsi dute Anesvadeko zuzendari ohien espetxe zigorreko eskaera, Jose Luis Gamarra presidente ohiarena, ordea, 6-8 urtetan mantendu dute, ustez 7,5 milioi euro lapurtzeagatik.

Bizkaiko Auzitegian Anesvadeko hiru zuzendarien aurkako epaiketarekin jarraitzen dute, Gobernuz Kanpoko Erakundeari dohaintzan emandako dirua ustez lapurtzeagatik 1996 eta 2006 urte bitartean.

F.M.F. finantza zuzendari ohiari eta J.M.S, entitateko zuzendari orokor ohiari 20 hilabeteko espetxe zigorra eskatu diete bi aldeen behin betiko txostenaren aurrerapen baten arabera. Gainera, sei hilabeteko isuna ordaindu beharko dute, 12 euro eguneko. Erantzukizun zibileko eskaera, ordea, kendu egin diete. Bi zuzendariak "errua bere gain hartu" dute. Zuzendari orokor ohiak jada hartutako dirua "osotasunean" itzuli du, eta finantza zuzendariak oraindik 64.000 euro zor ditu. Idatziz, epeka ordaintzeko konpromisoa hartu du, hirugarren lagunen abalarekin, izan ere, une honetan ezin duela diru hori itzuli azaldu du.

Era honetan, Fiskaltzak eta Anesvadeko abokatuek ondorioztatu dute biek eragindako kaltea euren gain hartu dutela, eta ondorioz, aringarri moduan kontuan izan behar dela. Hala ere, presidente ohiarentzat zigor eskaera mantendu dute, Gobernuz Kanpoko Erakundeari 7,5 milioi euroko kaltea eragiteagatik, eta 4,3 milioi itzuli dituen arren, oraindik 3,2 milioi "itzultzeke" dituela gogoratu dute.