Bilbobusen linea guztietako azken irteerak 20:00ak eta 20:30ak bitartean izango dira Urtezahar gauean

Ostiral honetan, hilak 31, Bilbobusen linea guztietako azken autobusak 20:00ak eta 20:30 bitartean irtengo dira eta, tarte horretan, astegunetako ohiko ordutegia izango dute. Ostiraletik larunbaterako gauean, berriz, Gautxori zerbitzua egongo da goizaldeko 01:00 eta 02:00ak bitarte. Azkena 02:00etan irtengo da bi abiapuntuetatik, familiako afariak errazteko.

Bilboko Udaleko Mugikortasun eta Jasangarritasun Sailak jakitera eman duenez, larunbatean, urtarrilak 1, Bilbobusen goizeko ordutegia 09:00etan hasiko da. Larunbatetik iganderako gauean, urtarrileko gainerako asteburuetan bezala, Gautxori zerbitzua egongo da goizaldeko 02:00ak arte, azken irteera ordu horretan izango delarik, hirigunetik.

Geltokien inguruko informazioa eskuragai izango da Udalaren webgunean, sare sozial ofizialetan eta 010 zenbakian.

Bestalde, Artxandako Funikularrak 21:00etan egingo du ostiraleko azken zerbitzua. Hurrengo egunean, larunbatean, 09:15etatik 14:30ak arte egongo da erabilgarri, eta 16:30etatik 22:00ak arte.