Egitarau zabala antolatu dute EAEko 17 erakundek zientzian diharduten emakumeen lana ikusarazteko

Euskadiko zientzia eta teknologia sareko 17 erakundek 'Emakumeak Zientzian' programaren seigarren aldia aurkeztu dute asteazken honetan, Donostian, eta iragarri egitarau zabala antolatu dutela ekimenaren helburuekiko konpromisoa berretsiz, hau da, zientzian diharduten emakumeen lana ikusaraztea, jarduera zientifiko-teknikoak gizonezkoen kontua direlako ustea apurtzea eta neskek eta nerabeek zientziako ikasketak hauta ditzaten sustatzea.

Helburu horiek kontuan hartuta, indarrak batu dituzte otsailaren 11n urtero ospatzen den Emakume eta Neska Zientzialarien Nazioarteko Eguna dela-eta elkarrekin egingo dituzten jardueren programa antolatzeko.

Otsailaren 11tik aurrera egingo dira 'Emakumeak Zientzian 2022' ekimenaren ekintzak Donostian, batik bat otsailaren 11tik 18ra bitarteko astean.

Era askotako jardueraz osatutako programa zabala antolatu da, "zientzia bada nesken kontua" mezua ahalik eta pertsona gehienei helarazteko eta zientziaren eta teknologiaren eremuan sarbide eta garapen profesional berdinzalea lortzeak duen garrantzia azpimarratzeko.

Antolatzaileek adierazi dutenez, adin guztietako jendeak izango du ekimenean parte hartzeko aukera. Esaterako, familientzako 'Zientziaren Izarrak' esperimentu tailerrak eskainiko dira Eureka! zientzia museoan.

Nerabeentzako ingeniaritza eta nanozientzia tailerrak egingo dira, eta eskolek mahai inguru batean parte hartu eta zenbait ikerketa zentro bisitatzeko aukera izango dute.

Halaber, emakume helduek kulturaren transmisioan duten zeregina balioesteko, 55 urtetik gorako emakumeentzako tailerrak antolatu dira. 'Esperientziaren boterea' izenburua du ekintzak, eta zenbait esperimentu labur eta erraz helaraziko zaizkie, edozein lekutan egiteko modukoak, kultura zientifikoa familietan eta gure inguruneetan ibil dadin.

Jarduera programa osoa ikusgai dago jada www.emakumeakzientzian.eus webgunean. Jarduerak aurrez aurrekoak, birtualak edo hibridoak izango dira. Aurrez aurreko jarduera guztiak behar diren osasun neurriekin egingo dira, eta horietako batzuetan covid txertaketa ziurtagiria aurkeztu beharko da.