Gizartea -
Aita kartzelan dago
Sei hilabete igaro dira Ruth eta Jose haurrak desagertu zirenetik
Urriaren 18an Poliziak Jose Breton atxilotu zuen seme-alaben desagertzearen susmagarri nagusia izateagatik.
Erredakzioa
Ruth eta Jose Breton Ortiz anai-arrebak duela sei hilabete desagertu ziren Kordobako Cruz Conde parkean. Aita kartzelan da, eta bere bertsioaren arabera, parke horretan ikusi zituen 6 eta 2 urteko haurrak azken aldiz.
Ordutik hona ez da haurren inguruko informaziorik izan, nahiz eta Poliziak aitaren familiaren lursaila eta inguruak miatu. Horrekin batera, Poliziak Guadalquivir ibaia ere miatu du eta Cruz Conde parkean ustez gertatutakoa hainbat aldiz berregin dute.
Igande arratsaldean elkarretaratzea egin dute Huelvan, hiri horretan amaren familia bizi baita.
Amaren familiak, hain zuzen, komunikatua atera du aste honetan iragan larunbatean Kordoban bildutako "jendetza" eskertzeko "hitzik ez dutela esateko. Horrekin batera, informazioa duen edozeini "Poliziarengana jotzeko" eskaera egin diote, helburu bakarra "gertatutakoa" argitzea baita.
Gertatutakoa
Urriaren 8an, Jose Breton haurren aitak seme-alaben desagertzea salatu zuen Polizian. Bere hitzen arabera, haurrak parkean zeudela despistatu egin zen eta ezin izan zituen aurkitu.
Hurrengo egunean, Ruth Ortiz amak Bretonek tratu txarrak ematen zizkiola salatu zuen Huelvako Polizia-etxean (tratu txar psikologikoak, irainak eta irainak).
Ondorengo egunetan, Poliziak Las Quemadillas aiton-amonen etxea miatu zuen, baita Guadalquivir ibaia ere.
Urriaren 18an, Poliziak Jose Breton atxilotu zuen seme-alaben desagertzearen susmagarri nagusia izateagatik. Hiru egun geroago, epaileak kartzelan sartu zuen.
