5.671 pertsona hil dira covidaren ondorioz EAEn pandemia hasieratik, 542 aurtengo urtarrilean

2020ko otsailaren 28an Eusko Jaurlaritzak lehenengo bi koronabirus kasuak baieztatu zituenetik (bata Gipuzkoan eta bestea Araban), 610.000 positibo inguru erregistratu dira EAEn. Kasu gehienak 40 eta 49 urte bitartekoen artean izan dira: 117.708.

Emakume gehiago kutsatu dira (317.941) gizon baino (291.999), baina hildakoei erreparatuz gero, gizonezko gehiago hil dira (2.906) emakumezko baino (2.765).

Eusko Jaurlaritzaren datuen arabera, 5.671 pertsona hil dira Euskal Autonomia Erkidegoan pandemia lehertu zenetik. 542 pertsona urtarrilean, seigarren olatua bete-betean zela; eta aurrez, abenduan, beste 181.

Urtarrila izan da, hain zuzen ere, pandemia osoan hildako gehien izan den bigarren hilabetea (227.000 kasu positibo ere izan dira), 2020ko apirilaren atzetik. Pandemia hasiera hartan, 904 heriotza eragin zituen covid-19ak hilabete bakarrean.

Covidagatik heriotza gutxien erregistratu ziren hilabetea, berriz, 2020ko uztaila izan zen, 12 hildakorekin.

Astelehenean argitaratuko du Osasun Sailak azken asteko heriotzen datua. Aurreko asteko txostenean, urtarrilaren 31tik otsailaren 6ra doanean, 74 hildako izan ziren.