Gizartea -
KORONABIRUSA
Lau hilabetera murriztu dute Ipar Euskal Herrian errefortzu dosia jasotzeko epea
Gaurtik aurrera errefortzu dosia ez izatera, osasun ziurtagiria baliogabetuko da Frantzian. Pirinio Atlantikoak departamenduan, % 8 ingururi indargabetuko dietela kalkulatu dute. Azken dosia jaso ostean, 7 hilabeteko balioa zuen aurretik.
ANE SANTESTEBAN | EITB MEDIA
Astearte honetatik aurrera, covid-19ari aurre egiteko errefortzu dosia jasotzeko epea zazpi hilabetetik laura murriztuko dute Ipar Euskal Herrian, osasun-ziurtagiriaren balioa luzatzeko.
Baldintzak, hortaz, gogortu egingo dira, eta aurrerantzean Frantziak covid ziurtagiria baliogabetuko die errefortzu-dosirik ez duten pertsona guztiei, baldin eta azken dositik lau hilabete baino gehiago igaro badira.
Kalkuluen arabera, Pirinio Atlantikoak departamenduan % 8 ingururi indargabetuko diete, eta Ipar Euskal Herrian, guztira, 17.000 pertsona geldituko dira gaurtik aurrera ziurtagiririk gabe.
Joan den hilean Frantziak txertaketa-ziurtagiriaren lege-proiektua onartu ondotik, txertatze-ziurtagiria derrigorrezkoa da jada Ipar Euskal Herriko leku gehienetan sartzeko. Txertatu gabeko pertsonei espazio publiko eta pribatu gehienetan sartzea galarazten die lege horrek.
