Gizartea -
Isilunea
Iñigo Cabacas omenduko dute Athleticen partida baino lehen
Bestalde, Athleticen Peñek Iñigo Cabacas omentzeko martxa isila egingo dute Moyua plazatik Mallorcaren aurkako partidaren aurretik.
Erredakzioa
Minutu bateko isilunea egin dute gaur San Mamesen, Athleticen eta Mallorcaren arteko partidaren aurretik, Iñigo Cabacas astelehenean hildako gaztearen omenez."Iñigo Cabacas zenaren, familia zuri-gorriko kide baten, omenezko ekitaldia egin beharrekoa zen", Javi Aldazabal Athleticeko idazkariak esan duenez.
Gainera, zaleek minutu bateko beste isilune bat egin dute partidaren bigarren zatiko 9. minutuan.
Horrez gain, Peñen Elkarteak aurretik iragarri zuen bezala, zale asko Athleticen jantzi beltzak soinean zituztela.
Manifestazioa Moyua plazatik
Athleticen partida hasi aurretik, 3.000 lagun inguru bildu dira Bilboko kaleetan, Athleticen Peñen Elkarteak deituta, Cabacas omentzeko, "Iñigo, gogoan zaitugu" lelopean. Elkarretaratzea 16:30ean abiatu da, Moyua plazatik, Bilboko Kale Nagusitik igaro eta San Mamesen amaitzeko. Bertan, ez da ertzainik izan.
San Mamesera heldutakoan, txalo zaparradak jo dituzte bildutakoek, hildakoaren senitartekoak, lore-sorta bat zeramatela, estadiora sartu diren bitartean. "Zaleen batasuna eta babesa argi geratu da", esan du Cabacasen lagun batek. Halaber, Cabacas hil zeneko "Ertzaintzaren karga polizialaren erantzuleak dimisio ematea" exijitu du lagun horrek.
