Gizartea -
A-15
A-15 errepidea itxita egongo da asteon, lau gauez, San Lorentzo tunelean lanak egiteko
22:00etatik 06:00etara itxiko dute bidea, Andoaingo noranzkoan Berastegiko lotunetik, eta kontrako noranzkoan, Sorabillatik.
Agentziak | EITB Media
San Lorentzo-Larre tunelean egiten ari diren obrak direla eta, A-15 errepidea itxita egongo da bi noranzkoetan, apirilaren 25, 26, 27 eta 28ko gauetan, 22:00etatik 06:00etara.
Gipuzkoako Foru Aldundiak zehaztu duenez, Andoaingo noranzkoan, Berastegiko lotunean itxiko dute trafikoa, eta kontrako noranzkoan, Sorabilla auzoan (Berastegi, Gipuzkoa).
Tunelean, besteak beste, segurtasun-instalazioetarako kontrol-sistema berri bat jarri nahi dute.
Nafarroatik Gipuzkoara doazen erabiltzaileek N-I errepidea hartu beharko dute Andoainen Altsasuraino, eta A-10 errepidea (Sakanako autobia) Irurtzuneraino (Nafarroa).
Berastegi, Elduain edo Berrobira doazen erabiltzaileek aukera izango dute, Andoain aldean, Berastegiko lotunean buelta eman eta GI-2130 errepidetik joateko, Tolosatik Leitzara doan errepidea erabiliz, euren helmugaraino.
Gipuzkoatik Nafarroara doazen bidaiariek ere N-Ietik jarraitu beharko dute Gasteizerako noranzkoan Altsasuraino eta A-10etik jarraitu Irurtzuneraino.
Lekunberri edo Leitza helmuga duten ibilgailuek GI-2135 errepidea erabili ahal izango dute Tolosatik.