Gizartea -
Jaiak
Martxan da Bilboko Aste Nagusiko kartela hautatzeko lehiaketa
Kartelak aukeratzeko bozketa sistema mistoa izango da. Lehenik, bederatzi kidek osatutako epaimahai batek sei kartel aukeratuko ditu, eta, ondoren, herri bozketa egingo da.
EITB MEDIA
Bilboko Udalak martxan jarri du 2022ko Aste Nagusia iragartzeko kartela hautatzeko lehiaketa. Hiriak abuztuaren 20an emango dio ongietorria Marijaiari, bi urteko etenaldiaren ondoren, eta prestaketak hasi dituzte jada.
Aste Nagusiaren 42.edizioa abuztuaren 20tik 28ra izango da, eta lehen urrats gisa, Bilboko Udalak jaiak iragartzeko ohiko kartel lehiaketarako deialdia egin du. Aurten, lehenengo aldiz, lanak udal webgunean aurkeztuko dira. Parte-hartzaile bakoitzak bi lan aurkeztu ahal izango ditu gehienez, eta epea ekainaren 5ean bukatuko da.
Aurkeztutako kartelak inon argitaragabeak izan beharko dira, lelo edo titulu bat izan beharko dute eta, gainera, dibertsitatea baloratuko da, hau da, rolak eta estereotipoak saihestea.
Lehiaketak bi fase izango ditu. Lehenik, epaimahai batek kartelen lehen hautaketa egingo du sei kartel aukeratuta. Bederatzi kidek osatuko dute epaimahai hori: diseinu grafikoaren eta komunikazioaren alorreko bost lagun, Udaleko hiru ordezkari eta Bilboko Konpartsen ordezkari bat.
Bigarren fasean, herri bozketa egingo da ekainaren 8tik 15era. Kartel irabazlea ekainaren 20an jakinaraziko dute, eta irabazleak 3.000 euroko saria jasoko du.