Euskadik eta Kantabriak lankidetza-hitzarmena sinatu dute osasun-laguntzaren arloan

Iñigo Urkullu Eusko Jaurlaritzako lehendakariak eta Miguel Angel Revilla Kantabriako presidenteak Euskadiren eta Kantabriaren arteko lankidetza-hitzarmena sinatu dute ostiral honetan Lanestosan. Hitzarmen horri esker, mugakide diren herrietako bizilagunek alboko erkidegora joan ahalko dira osasun-laguntza eskuratzera.

Lankidetza-hitzarmen horrek barne hartzen ditu lehen mailako arretako, arreta espezializatuko, larrialdietako, osasun-garraioko eta larrialdietako arretako laguntza-eremuak, baita historia kliniko elektronikoa ere.

Akordio horrek baldintzak ezarri ditu Euskadiko biztanleek Kantabrian bihotz edo birika transplanteak jasotzeko, eta, Kantabriako biztanle transexualen kasuan, Gurutzetako Ospitalean genitalen berreraikuntzarako kirurgia-programan sartzeko.

Halaber, lehen mailako arretaren eremuan, Valle de Villaverdeko adin txikiko biztanleak Osakidetzako Zallako eta Balmasedako osasun-zentroetako pediatria zerbitzuan artatuko dituzte. Larrialdietako arretari dagokionez, Kantabriako udalerri horretako herritarrak Balmasedako EAGn (Etengabeko Arretako Gunea) artatuko dira arreta medikorako eta erizaintzarako.

Lehendakariak ziurtatu du zerbitzuaren jarraitutasuna eta kalitatea bermatuta daudela, ez bakarrik mugakide diren erkidegoetan, baita lurralde osoan ere. Gainera, udan zehar "hurbileko eta kalitateko zerbitzu publikoa" eskaintzen dela esan du.

Urkulluk gaineratu du "profesionalek atseden hartu behar" dutela eta pandemia gure artean dagoela oraindik. Hala ere, azaldu du pandemiaren eragina txikiagoa dela pazienteentzat eta asistentziaren eskaria jaitsi egin dela, batez ere, arnas gaixotasunei dagokienez.