Gizartea -
Otsailetik espetxean
Polonian kartzelatuta dagoen Pablo Gonzalezek Estrasburgoko Giza Eskubideen Europako Auzitegira jo du
Salaketan argudiatu dutenez, espetxeratzeak ez ditu justiziako gutxieneko minimoak betetzen, eta Gonzalez dagoen baldintzek ez dituzte errespetatzen giza eskubideak. Euskal kazetaria otsailaren 28tik dago preso eta inkomunikatuta.
EITB MEDIA
Polonian otsailetik kartzelatuta dagoen Pablo Gonzalez euskal kazetariak Estrasburgoko Giza Eskubideen Europako Auzitegira jo du, bere auzia eta egoera bertara eramatea helburu.
'El Salto' eta 'Publico' hedabideen arabera, kazetariaren inguruko pertsona batek jarri du salaketa Auzitegiaren aurrean. Bertan argudiatu dute espetxeratzeak ez dituela betetzen justiziako gutxieneko minimoak, eta Gonzalez dagoen baldintzek ez dituztela giza eskubideak errespetatzen.
EITB Mediak, gainera, Oihana Goirienarekin hitz egin du, alegia, Pablo Gonzalezen bikotekidearekin; Goirienak esan duenez, familia "kezkatuta" dago, kazetariaren "osasun fisikoagatik eta buruko osasunagatik", kontuan izanik zazpi hilabete daramatzala kartzelan familiarekin komunikatu gabe. Senideek jakin badakite Estrasburgoko prozesua "luzea" izango dela, baina espero dute Auzitegiak aintzat hartzea bidegabekeria gauzatzen ari direla.
Gonzalez otsailaren 28tik dago preso eta inkomunikatuta, alegia, Polonia eta Ukraina arteko mugan Ukrainako gerraren eta horren ondorioen berri ematen ari zela atxilotu zutenetik. Poloniako Barne Segurtasunerako Agentziak Errusiaren espioi izatea egotzi dio.
Abuztuan, Poloniako Przemysleko auzitegiak kazetariaren behin-behineko espetxealdia beste hiru hilabetez luzatu zuen. Apelazio Auzitegiak luzapen horren aurkako demanda baztertu zuen.