Gizartea -
Ingurumena
Janariak ere kutsatzen du
Elikagaien ekoizpenak eta garraioak karbono aztarna eta aztarna hidrikoa sortzen dute, eta ingurumenerako kaltegarriak dira. Baina, zeintzuk dira kutsatzaileenak?
I. R. | EITB MEDIA
Janariak ere kutsatzen du, eta elikagai batzuek beste batzuek baino gehiago kaltetzen dute ingurumena, dela ekoizteko moduagatik, dela leku batetik besterako garraioagatik. Horrek guztiak karbono aztarna eta aztarna hidrikoa sortzen du, eta haragi gorria, oilaskoa edo esnekien deribatuak bezalako elikagaiek beste asko baino aztarna handiagoak eragiten dituzte.
PNAS aldizkarian argitaratutako ikerketa batek mendebaldeko gizarte baten eguneroko dietaren parte diren hainbat elikagai aztertu ditu, eta horietatik bi polo ateratzen dira: kutsatzaileenak eta gutxien kutsatzen dutenak. Lehenengoaren puntan haragi gorria dago, bai prozesatua zein prozesatu gabea; bigarren multzokoetan, berriz, intxaurrak, patatak eta lekaleak nabarmentzen dira, oro har, planetaren gaineko inpaktu minimoa dutelako.
Azterlan horren eta beste batzuen arabera, gehien kutsatzen duten elikagaiak karbono dioxido (CO2) gehien isurtzen dutenak dira, baita ekoizteko ur gehien behar dutenak ere. Horrela, behi-haragia, haragi gorria, munduko kutsatzaileenetako bat da.
Kasu honetan, PNASen ikerketa hainbat aldagaitan oinarritu da, hala nola lurraren eta uraren erabileran, eutrofizazioan (mantenugai ez-organiko gehiegi sortzea, hala nola nitrogenoa eta fosforoa) eta azidifikazioan (CO2 ekoizpena).