Gizartea -
Nafarroa
Kartzelatu egin dute Iruñean 12 urteko neska bati sexu erasoa egin dion gizona
Biek elkar ezagutzen zuten, eta sare sozial baten bidez harremanetan jarri ziren sexu-erasoa gertatu zen etxebizitzara joateko. Iruñeko udaltzainek gaztea atxilotu dute.
EITB MEDIA
Asteburuan Iruñean 12 urteko neskato bati sexu erasoa egitea egotzita atxilotu duten 20 urteko gizona kartzelatu egin du goardiako epaileak, Nafarroako Auzitegi Nagusiak jakinarazi duenez.
Erasoa igande goizaldean jazo zen, Arrotxapea auzoko etxebizitza batean, Pamplona Actual hedabideak gaur jakinarazi duenez. Ustezko erasotzaileak eta biktimak aurrez elkar ezagutzen zuten, eta sare sozial baten bidez harremanetan jarri ziren gaztea bizi den etxebizitzara joateko. Etxebizitzan pertsona gehiago bizi ziren.
Gertatutakoaren berri izan ondoren, udaltzainek inguruak arakatu zituzten, ustezko sexu-erasoaren egilea atxilotu arte. Astelehen honetan, Iruñeko Instrukzioko 5. zenbakiko Epaitegiaren esku utzi dute.
Errekurritu daitekeen ebazpen judizialean, epaileak egokitzat jotzen du behin behineko espetxealdia, "ihes egiteko berehalako arriskua" dagoela iritzita, "familian, gizartean edo lanean errotuta" ez dagoelako.
Kriminalitate zantzuei dagokienez, magistratuak adierazi du adingabeari egindako froga sinesgarria dela. Gaineratu duenez, biktimak "kontakizun koherentea eta kontraesanik gabekoa aurkezten du".
Bestalde, epaileak ikertuaren DNA laginak lortzeko eta telefonoaren edukia aztertzeko "kolaborazio eza" nabarmendu du. Adierazi du, halaber, ez deklaratzeko eskubideari heldu diola eta, beraz, ez duela egotzitako gertakarien deskargu bertsiorik eman.