Hezkuntzako lan eskaintza publikoaren probak urrian hasiko dira eta izena emateko epea ekainean irekiko da

Hezkuntzako lan eskaintza publikoaren lehen probak urrian hasiko dira eta izena emateko epea ekainean irekiko da, Jokin Bildarratzek zuzendutako Sailak ohar baten bidez jakinarazi duenez.

Eskabideak ekainetik aurrera aurkeztu ahal izango dira, eta urrian idatzizko probak hasiko dira. Ondoren, ahozkoak egingo dira.

Bigarren Hezkuntzako, Arte Plastikoetako eta Diseinuko eta Musika eta Arte Eszenikoetako irakasleen plazak betetzeko dira.

Bi prozedura egongo dira: oposizio-lehiaketa arrunta eta egonkortzeko oposizio-lehiaketa. Lehenengoan, oposizio-faseko bi probetako (baztertzaileak) bakoitza gainditu beharko dute hautagaiek.

Bigarren prozeduran, 2020ko abenduaren 31n azken 3 urteetan bitarteko langileek betetzen zituzten plazak betetzeko dira.

2023ko maiatzaren lehen hamabostaldian, epe guztiak zehazten dituen ebazpena argitaratuko da EAEko Aldizkari Ofizialean eta Hezkuntza Sailaren webgunean.